काठमाडौँ । देशका विभिन्न जिल्लामा भएका छुट्टाछुट्टै सवारी दुर्घटनामा चार जनाले ज्यान गुमाएका छन्। ललितपुर, मोरङ, सर्लाही र धादिङमा मंगलबार र बुधबार भएका दुर्घटनाहरूमा स्थानीय पैदल यात्री तथा सवारीधनीको मृत्यु भएको हो।

ललितपुरको गोदावरी नगरपालिका–९, छम्पीस्थित सडकमा बाग्मती प्रदेश–०१–००४ क १७१४ नम्बरको टिपरले ठक्कर दिँदा ३१ वर्षीय सञ्जीव रानाको मृत्यु भयो। गम्भीर घाइते भएका उनको पाटन अस्पतालमा उपचारका क्रममा मृत्यु भएको प्रहरीले जनाएको छ। टिपर चालकलाई नियन्त्रणमा लिइएको छ।

मोरङको रंगेली नगरपालिका–७, बक्राहा सडकमा को–२ त ४०९५ नम्बरको ट्याक्टरबाट झर्ने क्रममा सोही ट्याक्टरले किचेर भारत–कल्यागञ्ज निवासी ४० वर्षीय संजित महतोको मृत्यु भएको हो। नोबेल अस्पताल, विराटनगरमा उपचारका क्रममा मंगलबार दिउँसो मृत्यु भएपछि फरार ट्याक्टर चालकको खोजी भइरहेको जनाइएको छ।

सर्लाहीको बागमती नगरपालिका–११, रायमाझी चोकमा हाल नम्बर नखुलेको कारको ठक्करबाट ५० वर्षीय केशव शिवाकोटीको मृत्यु भएको छ। मंगलबार दिउँसो गम्भीर घाइते भएका उनको वीरगन्जस्थित न्युरो अस्पतालमा बुधबार बिहान उपचारका क्रममा मृत्यु भएको हो। कार चालक फरार रहेको र खोजी भइरहेको प्रहरीले बताएको छ।

उता धादिङको निलकण्ठ नगरपालिका–३, धादिङवेशीमा बा.८६ प ७७ नम्बर मोटरसाइकलले ठक्कर दिँदा ७५ वर्षीय भोज नारायण श्रेष्ठको ज्यान गएको छ। गम्भीर घाइते श्रेष्ठलाई जिल्ला अस्पतालपछि काठमाडौँ लैजाने क्रममा बाटोमै मृत्यु भएको हो। मोटरसाइकल चालकलाई प्रहरीले नियन्त्रणमा लिएको छ।

सबै घटनाबारे प्रहरीले आवश्यक अनुसन्धान अघि बढाइरहेको जनाएको छ।