७ मंसिर, काठमाडौं – आइतबार काठमाडौंमा प्रगतिशील लोकतान्त्रिक पार्टी (प्रलोपा) औपचारिक रूपमा घोषणा गरिएको छ। पार्टीमा माओवादी धाराका शीर्ष नेता, नेपाल समाजवादी पार्टी (नयाँ शक्ति) का संयोजक बाबुराम भट्टराई, माओवादी छाडेका जनार्दन शर्मा, राम कर्मी, सुदन किराती र रास्वपा छाडेका सन्तोष परियारलगायतका नेताहरू सक्रिय छन्।

पार्टीको मार्गदर्शक सिद्धान्त परिस्कृत मार्क्सवाद रहेको जनाइएको छ। घोषणा सभामा बोल्दै नेता जनार्दन शर्माले संक्षिप्त राजनीतिक प्रतिबद्धताको मस्यौदा वाचन गर्दै प्रलोपाले पछिल्लो जेनजी विद्रोहको विश्लेषण प्रस्तुत गरेको बताए। प्रलोपाले जेनजी विद्रोह हुनुमा भ्रष्टाचारको अन्त्य, बन्द भएका सामाजिक सञ्जाल खुलाउने र पार्टीहरूको रुपान्तरण एवं पुस्तान्तरण मुख्य कारण भएको निष्कर्ष निकालेको छ।

घोषणापत्रमा प्रलोपाले देशमा भ्रष्टाचारमुक्त शासन, युवाको नेतृत्व विकास, वैज्ञानिक प्रविधि र रोजगारी सिर्जना, जवाफदेही प्रणाली स्थापना, तथा ऐतिहासिक जनआन्दोलन, जनयुद्ध र जेनजी विद्रोहमा भएको बलिदानी खेर नजाने गरी नयाँ राजनीतिक पहल अनिवार्य भएको उल्लेख गरेको छ।

पार्टी गठनको उद्देश्य नयाँ दल थप्न वा नेता उत्पादन गर्न नभई वर्तमान राजनीतिक संरचना सुधार्दै आर्थिक, सामाजिक र राज्यव्यवस्थालाई समृद्ध र बलियो बनाउनु रहेको दाबी घोषणापत्रमा गरिएको छ।