काठमाडौँ । काठमाडौँ महानगरपालिकाले कार्यान्वयनमा रहेका प्राथमिक योजनाहरू ‘गौरव योजना’ र ‘स्वर्णिम योजना’ को प्रगति आगामी तीन दिनभित्र पेश गर्न प्रमुख प्रशासकीय अधिकृत सरोज गुरागाइँले निर्देशन दिएका छन्।

आज विभागीय प्रमुख र कार्यक्रम फोकल पर्सनहरूसँगको संयुक्त बैठकमा गुरागाइँले आन्तरिक सञ्चार र समन्वयमा जोड दिँदै, योजना कहिले टुङ्गिन्छ, समस्याहरू भए समाधानका उपाय के छन् भन्ने विवरण पेश गर्न आदेश दिएका हुन्। यी विवरणहरू सहरी योजना आयोग, योजना अनुगमन तथा मूल्यांकन एकाइ र प्रमुख प्रशासकीय अधिकृतको सचिवालयमा बुझाउनु पर्नेछ।

बैठकमा महाशाखा प्रमुख ध्रुवकुमार काफ्लेले आन्तरिक सञ्चारको अभावले उपलब्धिलाई अभिलेखन गर्न नसकिएको भन्दै आपसी संवाद र समन्वय आवश्यक रहेको बताए।

गौरव योजना अन्तर्गत ११ वटा कार्यक्रम रहेका छन्, जसमा ‘उज्यालो सहर, मेरो महानगर’, ‘धुलोरहित सडक’, ‘ढलरहित खोलानाला’, ‘महानगरले देख्छ’, ‘सुशासनका लागि अनलाइन सेवा’, ‘सबैको चाहना, ढुङ्गेधारा, हिटी र पोखरीको पुनःस्थापना’, ‘संस्कृति, सम्पदा र पर्यटन’, ‘महानगरको धन’, ‘रोजगारी र आय वृद्धि’, ‘काठमाडौँको समृद्धि’ र ‘मेरो रहर, सुन्दर र हरित सहर’ समावेश छन्।

स्वर्णिम योजना अन्तर्गत ३० वटा कार्यक्रम छन्, जसमा ‘सम्पदा मर्मत तथा संरक्षण’, ‘सांस्कृतिक महानगर’, ‘पर्यटकीय सहर’, ‘ढुङ्गेधारा हिटी र पोखरी’, ‘साथी महानगर’, ‘सबैको योजना, सबैको विकास’, ‘स्वरोजगार नगरबासी’, ‘क्लोथ बैंक’, ‘खेलकुद पूर्वाधार परियोजना’, ‘पूर्वाधार एम्बुलेन्स’, ‘सुन्दर महानगर’, ‘नदी सरसफाइ’, ‘पोखरी सरसफाइ’, ‘जैविक मल परियोजना’, ‘सुलभ फार्मेसी’, ‘स्वच्छ भान्छा कार्यक्रम’, ‘आरोग्य जीवन’, ‘यातायात तथा सडक सुरक्षा’, ‘स्मार्ट टोल’, ‘एकल सेवा केन्द्र’, ‘श्रम वैङ्क’, ‘सुन्दर विद्यालय परियोजना’, ‘रचनात्मक विद्यालय’, ‘पिउने पानी तथा सार्वजनिक शौचालय’, ‘डुवान समाधान’, ‘अनुसन्धान र अन्वेषण’, ‘न्याय चौतारी’, ‘इ–रेन्टल’, ‘एग्रो पुलिङ परियोजना’ र ‘मेट्रो मार्ट’ रहेका छन्।

महानगरले स्वास्थ्य, शिक्षा, रोजगारी, वातावरण सुधार र पूर्वाधारसँग सम्बन्धित कार्यक्रमलाई प्राथमिकतामा राखेको छ। योजनाहरूको प्रगति विवरण र समन्वय सुदृढ बनाएर सेवाग्राहीसम्म प्रभावकारी पहुँच सुनिश्चित गर्न महानगरले निर्देशन जारी गरेको छ।