जेनजी आन्दोलनका क्रममा सर्वोच्च अदालत परिसरमा गरिएको आगजनी तथा तोडफोड घटनामा संलग्न पाँच जनालाई प्रहरीले पक्राउ गरी सार्वजनिक गरेको छ। पक्राउ पर्नेमा राजु परियार, कुमार पराजुली, सुशील श्रेष्ठ र ज्योति थापा घतानी रहेका छन् भने एकजनाको पहिचान खुलाइएको छैन। जानकारी जिल्ला प्रहरी परिसरका प्रवक्ता पवनकुमार भट्टराईले दिए।

प्रहरीका अनुसार अदालतमा आगजनी गर्ने अन्य व्यक्तिहरूको पनि पहिचान भइसकेको छ र उनीहरूलाई छिट्टै कानुनी दायरामा ल्याइने तयारी भइरहेको छ। उक्त घटनामा छानबिन र कारबाहीका लागि सर्वोच्च अदालतले प्रहरीमा जाहेरी दिएको थियो।

जेनजी आन्दोलनका क्रममा अदालत परिसरमा आगजनी, तोडफोड र आपराधिक उपद्रवसम्बन्धी १०४ वटा जाहेरी परेका छन्। तीमध्ये २२ व्यक्तिगत, ६६ सरकारी कार्यालय तथा १६ संस्थागत/व्यापारिक प्रतिष्ठानका रहेका छन्।

आन्दोलनका क्रममा काठमाडौंमा मात्रै ४९ जनाको मृत्यु भएको प्रहरीले जनाएको छ, जसमध्ये सात जनाको पहिचान अझै खुलेको छैन। चुच्चेपाटीस्थित भाटभटेनी क्षेत्रमा फेला परेका सात कङ्काल पहिचान गर्न नसकिएको प्रहरीले बताएको छ। शव पूर्ण रूपमा जलेका कारण डीएनए नमुना निकाल्न नसकिएको र अन्य माध्यमबाट पहिचान गर्न प्रयास भइरहेको प्रहरीले जनाएको छ।

आन्दोलनसँग सम्बन्धित विभिन्न कसुरमा १५४ मुद्दा दर्ता भएको, २६७ जनालाई पक्राउ गरिएको, ८७ जना हाजिर–जमानीमा, ३३ जना धरौटीमा र ४३ जना पुर्पक्षका लागि थुनामा रहेको प्रहरीले जनाएको छ। ११३ जना हाल पनि हिरासतमा रहेको जानकारी दिइएको छ।