काठमाडौँ – ऊर्जा, जलस्रोत तथा सिँचाइ, भौतिक पूर्वाधार तथा यातायात र सहरी विकास मन्त्री कुलमान घिसिङले गत वर्षको अविरल वर्षासँगै आएको बाढी र पहिरोले क्षति पुर्‍याएको काभ्रेपलान्चोकका रोशी गाउँपालिका र नमोबुद्ध नगरपालिकाका विभिन्न वडाको स्थलगत निरीक्षण गरेका छन्।

सडक, पुल, खानेपानी प्रणाली र स्वास्थ्य चौकीमा क्षति पुगेको तर पुनर्निर्माण हुन नसकेको गुनासो आएपछि मन्त्री घिसिङ शुक्रबार सडक विभागका महानिर्देशक, स्थानीय पूर्वाधार विकास विभागका महानिर्देशक र सिँचाइ डिभिजन प्रमुखको टोली सहित निरीक्षणमा पुगेका थिए।

मन्त्री घिसिङले रोशी नदीले क्षति पुगेका संरचनाको पुनर्निर्माणलाई प्राथमिकतामा राख्ने र प्रभावकारी सेवा प्रवाह, विपद् प्रभावित क्षेत्रको पुनर्स्थापना तथा पुनर्निर्माण छिटो सम्पन्न गर्न बजेट विनियोजन गरेर काम अघि बढाइएको बताएका छन्।

गत वर्षको १०, ११ र १२ गतेको अविरल वर्षासँगै आएको बाढीले रोशी गाउँपालिका–१, २, ३ र नमोबुद्ध नगरपालिका–८, ९ तथा महाभारत र खानीखोला गाउँपालिका जोड्ने फलामे साँघुको पक्की पुलका दायाँबायाँ सडकमा क्षति पुर्‍याएको थियो। नदी किनार संरक्षण नभए पुल नै बगाउन सक्ने सम्भावना रहेको बताइएको छ।

भौतिक पूर्वाधार तथा यातायात मन्त्रालयले विपद् प्रभावित क्षेत्रका पुनर्निर्माण कार्य अगाडि बढाउन अर्थ मन्त्रालयमा बजेटको प्रस्ताव पठाइसकेको छ। बाढीले झोलुङ्गे पुल बगाएपछि वर्षातको समयमा स्थानीय आवतजावत पूर्ण रूपमा अवरुद्ध हुने गरेको छ।

नमोबुद्ध नगरपालिकाका प्रमुख कुन्साङ लामाले सङ्घीय र प्रदेश सरकारले बजेट अभाव नहुनेगरी पुनर्निर्माणमा सहयोग गर्ने आश्वासन दिएका भए पनि अहिलेसम्म काम अपेक्षाअनुसार अघि बढ्न नसकेको उल्लेख गरेका छन्।