कमन जेनजी नेपालका अध्यक्ष विकेश साहले नेकपा (एमाले) नेता महेश बस्नेतका आरोपप्रति कडा आपत्ति जनाएका छन्। बस्नेतले आफू सर्वोच्च अदालत, सिंहदरबार र एमाले मुख्यालयमा आगजनी र तोडफोडमा संलग्न भएको आरोप लगाएपछि अध्यक्ष साहले सामाजिक सञ्जालमार्फत ती आरोप ‘आधारहीन र झुटा’ भएको बताएका हुन्।

साहले बस्नेतलाई लक्षित गर्दै भने, “तपाईँहरू जस्तो लुट–भ्रष्टाचार र हत्या–आतङ्क हाम्रो पेसा होइन। हामी जेनजीहरू शान्तिपूर्ण आन्दोलनमार्फत देशमा बदलाव चाहन्छौँ।” उनले आफू षड्यन्त्र र हिंसामा विश्वास नगर्ने उल्लेख गर्दै बस्नेतलाई आजको सीसी क्यामरा र भिडियोको युगमा तथ्यसहित प्रमाण पेश गर्न चुनौती दिए।

“यदि तपाईंले आरोप प्रमाणित गर्न सकेनौँ भने माफी माग्ने नैतिक हैसियत राख्नुपर्छ,” साहले चेतावनी दिए।

यसअघि एमाले नेता बस्नेतले सामाजिक सञ्जालमा साह भाद्र २३–२४ का तोडफोड तथा हिंसात्मक घटनामा संलग्न रहेको दाबी गरेका थिए। साह र बस्नेतबीच सामाजिक सञ्जालमा आरोप–प्रत्यारोप र चर्काचर्की जारी छ।