काठमाडौँ — बुटवलको सुप्रिम सहकारी ठगी र सङ्गठित अपराध अभियोगमा पुर्पक्षका लागि थुनामा रहेका राष्ट्रिय स्वतन्त्र पार्टी (रास्वपा)का सभापति रवि लामिछाने र तत्कालीन गोर्खा मिडियाका सञ्चालक छविलाल जोशीको मुद्दाको सुनुवाइ तीन पटक स्थगित भएको छ। लामिछाने र जोशीको मुद्दा एउटै अदालतमा सुनुवाइ भइरहे पनि दुबै पक्षका कानुन व्यवसायीले अलग–अलग निवेदन दिएर सुनुवाइ स्थगित गराएका हुन्।

उच्च अदालत तुलसीपुर, बुटवल इजलासमा पहिलो पटक कात्तिक १३ गते पेसी स्थगित गरिएको थियो भने दोस्रो पटक कात्तिक २० र २७ गते सुनुवाइ स्थगित भएको थियो। चौथो पटक मंसिर ४ गते न्यायाधीश मिलनकुमार राई र सानु मैयाँ डंगोलको संयुक्त इजलासमा सुनुवाइ तय गरिएकोमा लामिछानेका कानुन व्यवसायीले पुनः स्थगित गराएका थिए।

लामिछाने र जोशीमाथि १० करोड ९९ लाख ३६ हजार रुपैयाँको सामूहिक बिगो कायम गरिएको छ। लामिछानेले आफ्नो भागको २ करोड ७४ लाख ८४ हजार रुपैयाँ बैंक जमानत पेस गरेका छन् भने जोशीले पनि उस्तै रकम बराबरको जमानत पेस गरेका थिए। तर, दुबैको हकमा बिगो कायम हुने रकम स्पष्ट नभएकाले रिहा गर्न नमिल्ने निर्णय अदालतले दिएको छ।

हाल पुर्पक्षका लागि लामिछाने भैरहवा कारागारबाट नख्खु कारागार ललितपुर सारिएका छन् भने जोशी भैरहवा कारागारमै छन्। मुद्दाको निरन्तर सुनुवाइ स्थगित हुँदा न्यायिक प्रक्रिया ढिला भएको र कानुन व्यवसायीले विविध कारण देखाएर स्थगित गर्ने गरेका छन्।