ब्रसेल्स — युरोपियन युनियन (ईयू) ले युक्रेनसहित सदस्यता लिन इच्छुक राष्ट्रहरूसँग दोस्रो चरणको सदस्यता वार्ता सुरु गरेको छ। युक्रेनले सदस्यता प्रक्रियालाई तीव्र बनाउन ईयूमाथि दबाब दिइरहेका बेला मङ्गलबार ब्रसेल्समा नयाँ चरणको वार्ता अघि बढाइएको हो।

हंगेरीको विरोधका कारण केही समय अवरुद्ध भएको सदस्यता प्रक्रिया गत महिना पुनः अघि बढेको थियो। त्यसक्रममा ईयूले युक्रेनसँग पहिलो चरणको औपचारिक वार्ता सुरु गरेको थियो भने अहिले दोस्रो चरणअन्तर्गत सुरक्षा, रक्षा, विदेश नीति तथा अन्य महत्त्वपूर्ण विषयमा छलफल भइरहेको छ।

ईयूको सदस्य बन्न इच्छुक राष्ट्रहरूले वातावरण, कृषि, न्याय प्रणाली, सुशासन तथा अन्य क्षेत्रलाई ईयूका कानुन र मापदण्डअनुसार रूपान्तरण गर्नुपर्ने हुन्छ। यसका लागि सदस्यता वार्तालाई विभिन्न विषयगत छ समूहमा विभाजन गरिएको छ।

मङ्गलबार ईयूका मन्त्रीहरूले आफ्ना युक्रेनी समकक्षीसँग सुरक्षा, रक्षा र विदेश नीतिसम्बन्धी विषयमा विस्तृत छलफल गरेका छन्। यद्यपि युक्रेन र ब्रसेल्समा सुरु हुन लागेको गर्मीयामको बिदाका कारण सबै विषयगत समूहको वार्ता निकट भविष्यमै निष्कर्षमा पुग्ने सम्भावना कम रहेको अधिकारीहरूले बताएका छन्।

रूसले सन् २०२२ मा युक्रेनमाथि पूर्ण आक्रमण सुरु गरेपछि युक्रेनले ईयू सदस्यताका लागि आवेदन दिएको थियो। तर पूर्ण सदस्यता प्राप्त गर्न उसले अझै लामो र जटिल प्रक्रिया पूरा गर्नुपर्नेछ।

युक्रेनसँगै मोल्डोभा पनि सदस्यता प्रक्रियाको दोस्रो चरणमा सक्रिय रूपमा सहभागी भएको छ। साथै, प्रमुख उम्मेदवारका रूपमा हेरिएको मोन्टेनेग्रोले अल्बानियासँगै आगामी महिनाहरूमा थप वार्तामा प्रगति गर्ने अपेक्षा गरिएको छ।

युरोपियन युनियनका विस्तारसम्बन्धी आयुक्त मार्टा कोसले मङ्गलबारलाई ईयू विस्तार प्रक्रियाका लागि ‘सुपर मङ्गलबार’को संज्ञा दिँदै सदस्यता वार्तालाई तीव्र गतिमा अघि बढाउनुपर्ने आवश्यकता औंल्याएकी छन्।