बेरोजगार युवायुवतीहरूलाई आकर्षक तलबको प्रलोभनमा पारी रोजगारीका लागि विभिन्न देशहरू लैजाने भन्दै लामो समयसम्म झुक्याएको आरोपमा दुई जना पक्राउ परेका छन् । 

पक्राउ पर्नेमा बारा घर भई बुढानीलकण्ठ बस्ने ४१ वर्षीय विष्णुराज उप्रेती र पाँचथर घर भई ललितपुर बस्ने ५८ वर्षीय शन्त कुमार चेम्जोङ रहेका छन् । 

विभिन्न देश पठाउँछु भन्दै उप्रेतीले पाँच लाख ७३ हजार रुपैयाँ र चेम्जोङले १२ लाख रुपैयाँ लिए विदेश नपठाई सम्पर्क विहीन भएको भनेर पीडितहरूले दिएको जाहेरी अनुसार काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले आइतबार पक्राउ गरेको हो ।  उनीहरूलाई थप अनुसन्धान तथा कारबाहीको लागि वैदेशिक रोजगार विभाग ताहाचल पठाइएको प्रहरीले जनाएको छ ।