सगरमाथा राष्ट्रिय निकुञ्जले आफ्नो क्षेत्रभित्र र आसपास हेलिकप्टर नउडाउने प्रस्तावसहितको पत्र नेपाल नागरिक उड्डयन प्राधिकरणमा पठाएको छ । राष्ट्रिय निकुञ्ज, गाउँपालिका र स्थानीय सरोकारवालको अनुरोध भन्दै निकुञ्जले आगामी जनवरी १ देखि हेलिकप्टर नउडाउने निर्णय कार्यान्वयन गर्न प्राधिकरणलाई आग्रह गरेको थियो ।

राष्ट्रिय निकुञ्ज तथा मध्यवर्ती क्षेत्रमा वन, वातावरण तथा वन्यजन्तुको सुरक्षा, बासस्थानको संरक्षण, ध्वनी प्रदूषण नियन्त्रण, खुम्बु क्षेत्रको व्यापार, व्यवसायमा असर परेको भन्दै हेलिकप्टर उडाउन नहुने निकुञ्जको प्रस्ताव थियो । 

जवाफमा प्राधिकरणले यस्तो प्रस्तावप्रति आफ्नो गम्भीर ध्यानकर्षण भएको र कार्यान्वयन गर्न नसकिन जनाएको छ । वायुसेवा क्षेत्र प्राधिकरणको एकल अधिकार क्षेत्रभित्र पर्ने भन्दै सगरमाथा राष्ट्रिय निकुञ्जले गरेको पत्राचारको कुनै कानुनी आधार र औचित्य नभएको प्राधिकरणले बताएको छ ।

 प्राधिकरणले भनेको छ- ‘तसर्थ निर्वाध र नियमित रुपमा व्यावसायिक उडान सञ्चालन गर्न सम्पूर्ण हेलिकप्टर कम्पनी तथा सरोकारवाला निकायलाई प्राधिकरण विशेष अनुरोध गर्दछ ।’