प्रदेश १ मा तीन मन्त्रीले राजीनामा दिए, मुख्यमन्त्रीविरुद्ध अविश्वास प्रस्ताव ल्याइँदै
(काठमाडौं) सत्तारूढ नेकपामा देखिएकाे विभाजनकाे असर प्रदेशसम्मै पुगेकाे छ । यसै क्रममा आइतबार बिहान प्रदेश १ सरकारका तीन मन्त्रीले राजीनामा दिएका छन् । नेकपाकाे पुष्पकमल दाहाल र माधवकुमार नेपाल पक्षधर तीन मन्त्रीले आइतबार बिहान ८ बजे सामूहिक राजीनामा दिएका हुन् ।
राजीनामा दिएर सरकारबाट बाहिरिनेमा सामाजिक विकास मन्त्री जीवन घिमिरे, सामाजिक विकास राज्यमन्त्री जसमाया गजमेर र उद्योग, पर्यटन, वन तथा वातावरण राज्यमन्त्री विजय विश्वास रहेका छन् । उनीहरूले आइतबार नै मुख्यमन्त्री शेरधन राइविरूद्ध अवश्वासकाे प्रस्ताव दर्ता गराउन लागेकाे समेत बताएका छन् ।
‘हामीले राजीनामा दिएका हाैँ, यसपछि अविश्वासको दर्ता प्रस्तावको कुरा आइहाल्छ,’ राज्यमन्त्री जसमाया गजमेरले न्यूज २४सँग भनिन् । तर उनले अविश्वास प्रस्तावबारे थप खुलाउन चाहिनन् ।
