अमेरिकी राष्ट्रपतिमा डेमोक्रेटिक पार्टीका उम्मेदवार पूर्वउपराष्ट्रपति जो बाइडेनले पछिल्लो जनमत सर्वेक्षणमा राष्ट्रपति डोनाल्ड ट्रम्पभन्दा झन्डै १२ प्रतिशतले अग्रता बनाएको देखिएको छ । 

बुधबार सार्वजनिक पछिल्लो राष्ट्रव्यापी मत सर्वेक्षणमा बाइडेनले ५४ प्रतिशत र राष्ट्रपति ट्रम्पले ४२ प्रतिशत मत प्राप्त गर्ने उल्लेख छ । पछिल्ला राष्ट्रपति निर्वाचनहरूमा भन्दा यसपटक सबैभन्दा बढी मतान्तर देखिएको छ । सन् २०१६ को राष्ट्रपति निर्वाचनमा ट्रम्पसँग पराजित हिलारी क्लिन्टनले प्राप्त गरेको मतभन्दा अहिले बाइडेनले धेरै मत प्राप्त गर्नेछन् र दुवै उम्मेदवारबीचको मतान्तर अझ बढ्दै गएको छ । गत वर्षदेखि नै सिएनएनले गरेका हरेक मत सर्वेक्षणमा बाइडेनले नै अग्रता बनाइरहेका छन् । 

विगतमा रिपब्लिकन पार्टीतर्फ झुकाव राख्ने कैयौँ मतदाताले यसपटक बाइडेनलाई समर्थन गर्न थालेको सर्वेक्षणमा उल्लेख छ । महिला मतदातामध्ये बाइडेनलाई मतदान गर्नेको संख्या ६७ र ट्रम्पलाई मतदान गर्ने ३७ प्रतिशत छ भने गैरअश्वेत मतदाताबीच पनि ७१–२४ प्रतिशतको मतान्तर छ । 

राष्ट्रपति ट्रम्पलाई स्वीकारोक्ति दर ४२ प्रतिशत छ भने ५५ प्रतिशतले उनको कार्यशैलीलाई रुचाएका छैनन् । अमेरिकामा यही ३ नोभेम्बरमा राष्ट्रपति चयनका लागि निर्वाचन हुँदै छ ।