प्रधानमन्त्री केपी शर्मा ओलीले छिट्टै आफूले मिर्गौला प्रत्यारोपण गर्ने बताएका छन्।

बिहीबार राजधानीमा आयोजित बागमती प्रदेशस्तरीय अगुवा कार्यकर्ताको प्रशिक्षण कार्यक्रममा बोल्दै प्रधानमन्त्री ओलीले मिर्गौला प्रत्यारोपणका लागि पाँच दिन अस्पताल बस्ने र छैठौं दिन निवासमा आएर काम गर्ने बताए।

‘छिट्टै मिर्गौला प्रत्यारोपण गर्दैछु। पाँच दिन अस्पताल बस्छु। छैठौं दिनदेखि काम गर्छु,’ प्रधानमन्त्री ओलीले भने,‘अझै १०-१५ वर्ष मलाई केही हुन्न।’

उनले मान्छेहरूले आफूलाई बिरामी छ, बिरामी छ भने पनि आफूले १७-१८ घन्टा काम गर्ने गरेको दाबी गरे। ‘म १७-१८ घन्टा काम गर्छु। बिरामी भन्या कुरा यस्तै हो भइरहन्छ,’ ओलीले भने ।

१२ वर्षअघि ओलीले पहिलो पटक मिर्गौला प्रत्यारोपण गरेका थिए। पछिल्लो समय उनको मिर्गौलाले काम गर्न छोडेको छ। अहिले उनी नियमित रूपमा डायलासिस गरिरहेका छन्।