काठमाडौं । भोटेकोशी बाढी तथा त्यसबाट प्रभावित क्षेत्रमा हालसम्म १ हजार ३५७ जनाको शव फेला परेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। फेला परेका शवमध्ये विभिन्न स्थानबाट मानव अङ्गसमेत भेटिएको प्राधिकरणले जनाएको छ।

प्राधिकरणका अनुसार फेला परेका शवमध्ये १०२ जनाको सनाखत भई परिवारले बुझिसकेका छन्। बाढीपछि अझै ५ हजार ३२६ जना सम्पर्कविहीन छन्। सम्पर्कविहीनमध्ये रसुवाका २ हजार ८६०, नुवाकोटका १ हजार ९८१ नेपाली तथा ५८७ जना विदेशी पर्यटक रहेको जनाइएको छ।

प्राधिकरणकी प्रवक्ता शान्ति महतका अनुसार हालसम्म १३ हजार ५८३ जनाको उद्धार गरिएको छ भने बाढीबाट घाइते ६ हजार ८२७ जनाको उपचार गरिएको छ। विभिन्न १० अस्पतालमा ३२७, नेपाली सेनामार्फत ३ हजार ४०४ र सशस्त्र प्रहरी बलमार्फत ३ हजार ९६ जनाको उपचार गरिएको उनले जानकारी दिइन्।

उद्धार तथा राहतका लागि नेपाल प्रहरीका ७ हजार ९१२, नेपाली सेनाका ९ हजार २८७ र सशस्त्र प्रहरी बलका ४ हजार २०३ गरी २१ हजार ४०२ सुरक्षाकर्मी परिचालन गरिएको छ।

प्रभावित क्षेत्रमा ३९ वटा होल्डिङ सेन्टर स्थापना गरी ३ हजार ५३३ जनालाई राखिएको छ। तीमध्ये रसुवामा ६६९, नुवाकोटमा २ हजार ६५१ र धादिङमा २१३ जना रहेका छन्।

उद्धार तथा राहतका लागि नेपाली सेनाले १ हजार १५७ पटक, काठमाडौंबाट निजी क्षेत्रले १२९ पटक र सशस्त्र प्रहरी बलले २०३ पटक हेलिकप्टर उडान गरेका छन्।

सरकारले रसुवा र नुवाकोटलाई १/१ करोड तथा धादिङलाई ५० लाख रुपैयाँ नगद राहत उपलब्ध गराएको छ। साथै, प्रभावित १५ पालिकालाई १३ करोड ५० लाख रुपैयाँ राहत उपलब्ध गराइएको प्राधिकरणले जनाएको छ।

प्रभावित क्षेत्रमा ५० हजार लिटर डिजेल, १८ हजार लिटर पेट्रोल र १८ हजार लिटर हवाई इन्धन मौज्दात रहेको छ भने ४५७ ग्यास सिलिन्डर अनुदानमा उपलब्ध गराइएको छ।

विद्युत् आपूर्तितर्फ रसुवाका ७८ प्रतिशत, नुवाकोटका ९६ दशमलव ७ प्रतिशत र धादिङका ९९ दशमलव ८ प्रतिशत घरधुरीमा विद्युत् सेवा सुचारु भएको प्राधिकरणले जनाएको छ।

बाढी प्रभावितका लागि स्वास्थ्य मन्त्रालयमार्फत १५० जनाभन्दा बढी स्वास्थ्य जनशक्ति परिचालन गरी मनोसामाजिक परामर्श सेवा प्रदान भइरहेको पनि प्राधिकरणले जनाएको छ।