वन अधिकृतविरुद्ध १५ हजार बिगो दाबी गर्दै अख्तियारद्वारा मुद्दा दायर
अख्तियार दुरुपयोग अनुसन्धान आयोगले एक वन अधिकृतविरुद्ध १५ हजार बिगो दाबी गर्दै विशेष अदालतमा मुद्दा दायर गरेको छ ।
डिभिजन वन कार्यालय, उदयपुरका योजना शाखा प्रमुख (सातौँ) भुवन पौडेलविरुद्ध मुद्दा दायर भएको हो । अख्तियारले जनाएअनुसार काठको लगत समर्थन तथा लिलाम सहमति सिफारिस गरिदिएबापत उनले सेवाग्राहीसँग लाभ लिएका थिए ।
उनका विरुद्ध भ्रष्टाचार निवारण ऐन २०५९ को दफा ३ (१) बमोजिम १५ हजार बिगो कायम गरी कैद र बिगोबमोजिम जरिवाना सजाय माग गरिएको छ ।
