इन्डोनेसियाको पूर्वी क्षेत्रमा पर्ने फ्लोरेस द्वीप नजिकै ७.७ म्याग्निच्युडको शक्तिशाली भूकम्प गएको छ । अमेरिकी भूगर्भ सर्भेका अनुसार स्थानीय समय अनुसार शनिबार बिहान ५ बजेर ५८ मिनेटमा गएको भूकम्पबाट हालसम्म कम्तीमा दुई जनाको मृत्यु भएको पुष्टि भएको छ ।

फ्लोरेस क्षेत्र भूकम्पीय दृष्टिले संवेदनशील क्षेत्र मानिन्छ । सन् १९९२ मा यही क्षेत्रमा ७.७ म्याग्निच्युडको भूकम्पपछि आएको सुनामीमा ठूलो जनधनको क्षति भएको थियो।

इन्डोनेसियाको राष्ट्रिय विपद् व्यवस्थापन एजेन्सीले जारी गरेको विज्ञप्ति अनुसार माउमेरे बन्दरगाहमा एक पुरुष र एक महिला गरी दुई जनाको मृत्यु भएको छ भने एक जना घाइते भएका छन् ।

भूकम्पको केन्द्रविन्दु पूर्वी नुसा तेङ्गारा प्रान्तको एन्दे सहरबाट करिब ६८ किलोमिटर उत्तर–पश्चिममा र जमिनबाट १० किलोमिटर गहिराइमा रहेको थियो । मुख्य भूकम्प गएको आधा घण्टाभित्रै ५.९, ५.६ र ६.१ म्याग्निच्युडका तीनवटा शक्तिशाली पराकम्पहरू महसुस गरिएका थिए।

भूकम्पका कारण माउमेरे क्षेत्र र बन्दरगाह आसपासका थुप्रै घर तथा भौतिक संरचनाहरूमा ठूलो क्षति पुगेको स्थानीय सञ्चारमाध्यमहरूले जनाएका छन् ।

भूकम्पपछि इन्डोनेसियाको मौसम तथा भूगर्भ एजेन्सीले प्रभावित तटीय क्षेत्रहरूमा सुनामीको चेतावनी जारी गर्दै सर्वसाधारणलाई नदी किनार र समुद्र तटबाट टाढा रहन तथा उच्च भूभागतर्फ जान आग्रह गरेको थियो ।