ट्रम्पद्वारा इरानमाथि सम्भावित सैन्य आक्रमण रोक्ने संकेत, कूटनीतिक सम्झौताको प्रस्ताव
वासिङ्टन — अमेरिकी राष्ट्रपति डोनाल्ड ट्रम्पले इरानसँग छिटो कूटनीतिक सम्झौता भएमा उसमाथि गर्न लागिएको सैन्य आक्रमण रोक्ने बताएका छन्।
सामाजिक सञ्जाल ट्रुथ सोसियलमार्फत सन्देश जारी गर्दै ट्रम्पले इरानको परमाणु गतिविधिबाट उत्पन्न “धम्की अन्त्य” र रणनीतिक रूपमा महत्वपूर्ण हर्मुज जलडमरूमध्य तत्काल खुला गर्ने सर्तमा सैन्य कारबाही रोक्न सकिने बताएका हुन्।
ट्रम्पले यो निर्णय इजरायलसँगको परामर्श र सहमतिमा लिएको दाबी गरेका छन्। अमेरिकाले इरानमाथि ठूलो सैन्य हमला गर्ने तयारी गरिरहेको समाचार सार्वजनिक भइरहेका बेला उनको यस्तो भनाइ आएको हो।
उनले अमेरिका दोस्रो विश्वयुद्धपछि कहिल्यै नदेखिएको सैन्य शक्ति प्रयोग गर्न तयार रहेको दाबी गर्दै इरान र मध्यपूर्वका अन्य देशले सम्झौताका लागि समय मागेपछि आक्रमण स्थगित गरिएको बताएका छन्।
ट्रम्पका अनुसार प्रस्तावित सम्झौताका मुख्य विषयमा सहमति नजिक पुगेको छ, जसमा हर्मुज जलडमरूमध्य खुला गर्ने र इरानको परमाणु कार्यक्रमसम्बन्धी विवाद समाधान गर्ने विषय समावेश छन्।
यस विषयमा इरानले भने हालसम्म आधिकारिक प्रतिक्रिया दिएको छैन। यसैबीच, अमेरिकी सरकारले मध्यपूर्वमा रहेका आफ्ना नागरिकलाई उच्च सतर्कता अपनाउन र सम्भावित यात्रा अवरोधका लागि तयार रहन चेतावनी जारी गरेको छ।
