काठमाडौं — भारत निर्वासनमा रहेकी बंगलादेशकी पूर्वप्रधानमन्त्री शेख हसिनाले नयाँ दिल्लीबाट भर्चुअल सम्बोधन गर्ने भएपछि बंगलादेशले आपत्ति जनाएको छ।

अगस्ट ५ मा फरेन करेस्पोन्डेन्ट्स क्लब अफ साउथ एसियाले आयोजना गर्ने कार्यक्रममा हसिनाको सहभागिताले दुई देशबीचको सम्बन्धमा असर पर्न सक्ने भन्दै बंगलादेशले भारतसँग आफ्नो धारणा स्पष्ट पार्न आग्रह गरेको हो।

बंगलादेशकी परराष्ट्र राज्यमन्त्री शामा ओबेद इस्लामले भगोडा अभियुक्तलाई राजनीतिक गतिविधि गर्न अनुमति दिँदा द्विपक्षीय सम्बन्धमा समस्या आउन सक्ने बताइन्। उनले आवश्यक परे कूटनीतिक माध्यमबाट विषय उठाउने जानकारी दिइन्।

सन् २०२४ मा विद्यार्थी आन्दोलनपछि सत्ता छाडेर भारत पुगेकी हसिनालाई फिर्ता पठाउन बंगलादेशले पटक–पटक आग्रह गर्दै आएको छ। हसिनाले भने आगामी डिसेम्बरतिर स्वदेश फर्किने र आत्मसमर्पण गर्ने योजना रहेको बताएकी छन्।

हसिना नेतृत्वको सरकार ढलेपछि उनीमाथि मानवताविरुद्ध अपराधको अभियोग लागेको थियो। सो मुद्दामा बंगलादेशको विशेष न्यायाधीकरणले उनलाई मृत्युदण्डको सजाय सुनाएको थियो।