क्वालालम्पुर — विद्यालयभित्रै आफ्नै सहपाठी १६ वर्षीया छात्रा याप सिङ जुएनको हत्या गरेको अभियोगमा मलेसियाका एक नाबालिग किशोरमाथि अदालतमा मुद्दा सुरु भएको छ।

गत अक्टोबरमा क्वालालम्पुर बाहिरी क्षेत्रको एक माध्यमिक विद्यालयको शौचालयमा भएको घटनामा ती किशोरमाथि धारिलो हतियार प्रहार गरी छात्राको हत्या गरेको आरोप लागेको छ। अभियुक्तले भने आरोप अस्वीकार गर्दै आफू निर्दोष रहेको दाबी गरेका छन्।

घटनाका बेला १४ वर्षका रहेका अभियुक्तको परिचय मलेसियाली कानुनअनुसार सार्वजनिक गरिएको छैन। प्रहरीले उनको साथबाट एउटा नोट फेला परेको र सामाजिक सञ्जाल तथा अनलाइन हिंसात्मक सामग्रीको प्रभावबारे अनुसन्धान भइरहेको जनाएको छ।

घटनापछि मलेसियामा विद्यालय हिंसा र बालबालिकामा सामाजिक सञ्जालको प्रभावबारे बहस चर्किएको छ। सरकारले १६ वर्षमुनिका बालबालिकालाई प्रमुख सामाजिक सञ्जालमा खाता खोल्न प्रतिबन्ध लगाउने व्यवस्था समेत गरेको छ।

मलेसियामा आपराधिक दायित्वको उमेर १० वर्ष रहेको छ। नाबालिग भएकाले अभियुक्तलाई मृत्युदण्ड नदिइने भए पनि दोषी ठहर भएमा ३० देखि ४० वर्षसम्मको कैद र कोरा हान्ने सजाय हुन सक्नेछ।