नेपालगञ्ज — उच्च अदालत तुलसीपुर, नेपालगञ्ज इजलासले आर्थिक वर्ष २०८२–८३ मा कुल २ हजार १६३ मुद्दामध्ये १ हजार ३५४ मुद्दा फर्छ्यौट गर्दै ६२.६० प्रतिशत फर्छ्यौट दर हासिल गरेको जनाएको छ।

शुक्रबार वार्षिक प्रगति विवरण सार्वजनिक गर्दै न्यायाधीश बामदेव ज्ञवालीले अदालतले दुई वर्षभन्दा पुराना सबै मुद्दा टुंग्याउन सफल भएको जानकारी दिए। उनका अनुसार असार मसान्तसम्म १८ महिनाभन्दा पुराना १५ मुद्दा मात्रै बाँकी रहेका छन्, जसलाई साउनभित्रै फर्छ्यौट गर्ने लक्ष्य राखिएको छ।

अदालतका अनुसार गत आर्थिक वर्षबाट जिम्मेवारी सरेका ६४२ र नयाँ दर्ता भएका १ हजार ५२१ गरी कुल २ हजार १६३ मुद्दामध्ये १ हजार ३५४ फर्छ्यौट भएका छन् भने ८०९ मुद्दा अझै विचाराधीन छन्।

वार्षिक कार्ययोजनाअनुसार १ हजार ७४३ मुद्दा फर्छ्यौट गर्ने लक्ष्य रहेकामा अदालतले ७७.७ प्रतिशत लक्ष्य पूरा गरेको जनाएको छ। जेनजी आन्दोलनका क्रममा अदालतमा भएको आगजनीका कारण चार महिना सुनुवाइ प्रभावित हुँदा फर्छ्यौट दरमा कमी आएको न्यायाधीश ज्ञवालीले बताए।

अदालतले आगजनीबाट जलेका ७५३ मिसिलको प्राप्ति तथा प्रमाणीकरण कार्य शतप्रतिशत सम्पन्न गरेको पनि जनाएको छ।