अमेरिका र इरानबीच बढ्दो तनावका बीच समुद्रको खारा पानीलाई पिउनयोग्य बनाउने डिसालिनेसन (पानी शुद्धीकरण) प्लान्टहरू पनि आक्रमणको निशानामा पर्न थालेका छन्।

इरानले शनिबार अमेरिकाले होर्मोजगान प्रान्तस्थित बोंजी डिसालिनेसन प्लान्टमा हवाई आक्रमण गरी ध्वस्त पारेको दाबी गरेको छ। इरानी अधिकारीहरूका अनुसार उक्त आक्रमणपछि आसपासका २० गाउँका करिब १० हजार बासिन्दाको खानेपानी आपूर्ति पूर्ण रूपमा अवरुद्ध भएको छ।

स्थानीय प्रशासनका अनुसार प्लान्ट नष्ट भएपछि प्रभावित क्षेत्रमा तत्काल वैकल्पिक खानेपानीको व्यवस्था गर्न कठिनाइ भइरहेको छ, जसका कारण स्थानीय बासिन्दाको दैनिक जीवन प्रभावित बनेको छ।

यता, कुवेतले पनि इरानले लगातार दोस्रो दिन आफ्नो पानी शुद्धीकरण प्लान्टलाई निशाना बनाएको आरोप लगाएको छ। कुवेती अधिकारीहरूका अनुसार देशमा प्रयोग हुने करिब ९० प्रतिशत पिउने पानी समुद्री पानी प्रशोधन गरेर उत्पादन गरिन्छ। त्यसैले यस्ता पूर्वाधारमा हुने कुनै पनि आक्रमणले देशको खानेपानी आपूर्तिमा गम्भीर संकट निम्त्याउन सक्ने चेतावनी दिइएको छ।

मरुभूमि क्षेत्र भएको सानो देश कुवेतका लागि डिसालिनेसन प्लान्टहरू जीवनरेखा सरह रहेको उल्लेख गर्दै त्यस्ता संरचनामा हुने क्षतिले जनजीवन नै जोखिममा पार्न सक्ने अधिकारीहरूको भनाइ छ।

दुवै पक्षका आरोपबारे अमेरिकाले तत्काल कुनै आधिकारिक प्रतिक्रिया सार्वजनिक गरेको छैन। पछिल्ला दिनहरूमा अमेरिका–इरान तनावले सैन्य क्षेत्रसँगै अत्यावश्यक नागरिक पूर्वाधारहरूमा समेत असर पर्न थालेको संकेत देखिएको छ।