अर्थमन्त्री डा. स्वर्णिम वाग्लेले सरकारी नियुक्ति, सरुवा र बढुवामा राजनीतिक पहुँच तथा दबाबको अन्त्य गर्ने प्रतिबद्धता व्यक्त गरेका छन्। उनले सरकारको प्राथमिकता व्यक्ति छनोट नभई कामको परिणाम निकाल्नु रहेको स्पष्ट पारे।

बिहीबार आन्तरिक राजस्व विभागमा आयोजित देशभरका कर अधिकृतहरूको भेलालाई सम्बोधन गर्दै अर्थमन्त्री वाग्लेले प्रधानमन्त्री बालेन्द्र साहले समेत आफूलाई ‘पात्रभन्दा परिणाम’ को चासो रहेको बताएको जानकारी दिए।

उनका अनुसार प्रधानमन्त्री साहले विधि र प्रक्रियाअनुसार काम गर्दै देखिने परिणाम दिन निर्देशन दिएका छन्। “कसलाई ल्याउने वा कसलाई राख्ने भन्ने होइन, कामको नतिजा आउनुपर्छ भन्ने प्रधानमन्त्रीज्यूको स्पष्ट धारणा छ,” वाग्लेले भने।

अर्थमन्त्री वाग्लेले विगतमा सरुवा र नियुक्तिका लागि राजनीतिक दल, गुट वा शक्तिकेन्द्रको पहुँच खोज्ने प्रवृत्तिले कर्मचारी प्रशासनलाई कमजोर बनाएको बताए। अब योग्यता, क्षमता र कार्यसम्पादनका आधारमा मात्र जिम्मेवारी दिने प्रणाली स्थापित गरिने उनको भनाइ छ।

“राजनीतिक दबाब कुनै पनि हालतमा स्वीकार्य हुँदैन। व्यक्ति होइन, नतिजा हाम्रो प्राथमिकता हो,” उनले भने, “कसैको आफन्त, नातेदार वा कुनै नेताको सिफारिसका आधारमा निर्णय हुने छैन।”

उनले आफूले गरेका नियुक्तिहरू पनि निष्पक्ष मूल्याङ्कन र योग्यताका आधारमा भएको दाबी गरे। राष्ट्र बैंकको डेपुटी गभर्नर नियुक्तिमा समेत धेरैले पहुँच र लबिङको प्रयास गरे पनि योग्य व्यक्ति छनोट गरिएको उनले उदाहरण दिए।

अर्थमन्त्री वाग्लेले राजस्व प्रशासन सुधारका लागि आफू देशभरका आन्तरिक राजस्व कार्यालय, भन्सार कार्यालयलगायत निकायको स्थलगत अनुगमनमा जाने बताए। कर्मचारीका समस्या, चुनौती र सुझाव प्रत्यक्ष सुन्न आफू तयार रहेको उनले बताए।

“कर्मचारीहरूले डराउनुपर्ने अवस्था छैन। समस्या वा सुझाव भए सिधै मन्त्रालयमा राख्न सक्नुहुन्छ,” उनले भने।

उनले राजस्व प्रशासनमा हुने अनियमितता र कमजोरीबारे प्रमाणसहित जानकारी दिन कर्मचारीलाई आग्रह गरे। सरकारको लक्ष्य व्यक्तिगत निर्णयभन्दा पनि प्रणाली सुधार, सुशासन प्रवर्द्धन र संस्थागत क्षमता विकास रहेको उनको भनाइ छ।

अर्थमन्त्री वाग्लेको यस्तो अभिव्यक्ति सरकारका नियुक्ति र प्रशासनिक निर्णयमा राजनीतिक हस्तक्षेप घटाउने प्रयासका रूपमा आएको छ।