डलर साटिदिने भन्दै लुटपाट गरेको आरोपमा प्रहरीले काठमाडौँको कपनबाट ४ जनालाई पक्राउ गरेको छ । प्रहरी वृत्त बौद्धबाट खटिएको टोलीले उनीहरूलाई शनिबार पक्राउ गरेको हो ।

पक्राउ पर्नेमा सिन्धुपाल्चोकको बाह्रबिसे नगरपालिका–३ घर भई काठमाडौँको जोरपाटी बस्ने ३० वर्षीय धनबहादुर तामाङ, कपन बस्दै आएका ४१ वर्षीय लोकबहादुर तामाङ, बुढानीलकण्ठ बस्ने ३८ वर्षीय राजकुमार लामा र बौद्धस्थित नयाँ बस्ती बस्ने ३७ वर्षीय विजय तामाङ छन् ।

आरोपीहरूले पीडितबाट लुटेको ३ लाख ८४ हजार नगद बरामद गरिएको जिल्ला प्रहरी परिसर काठमाडौँका एसपी पवन भट्टराईले रातोपाटीलाई बताए । लुट्नको लागि पीडितलाई देखाउन उनीहरूले प्रयोग गरेको ५० दरको एकथान अमेरिकी डलर पनि प्रहरीले बरामद गरेको छ । आरोपीहरु बिरुद्ध प्रहरी वृत्त बौद्धले चोरी तथा डाँका सम्बन्धी कसुरमा अदालतबाट ५ दिनको म्याद लिएर अनुसन्धान गरिरहेको छ । लुटेराहरूले ‘सक्कली डलर छ’ भन्दै एक दुई थान डलर देखाएर कागजको बिटो दिएर पीडितबाट नगद लुट्ने गरेका छन् ।

पक्राउ परेका आरोपी धनबहादुर तामाङविरुद्ध यसअघि पनि ठगी सम्बन्धी कसुरमा ६ वटा जाहेरी दर्ता भएको भेटिएको छ । लोकबहादुर तामाङ खोटा चलन, अभद्र व्यवहार, ठगी र बैङ्किङ कसुर मुद्दामा फरार देखिएका छन् ।