सरकारले पोखरा अन्तर्राष्ट्रिय विमानस्थलमा अन्तर्राष्ट्रिय वायुसेवा कम्पनीका लागि विभिन्न शुल्क छुट दिने निर्णय गरेको छ। मन्त्रिपरिषद् बैठकले २०८५ भदौ मसान्तसम्म पार्किङ, ल्यान्डिङ र नेभिगेसन शुल्क पूर्ण रूपमा छुट तथा ग्राउन्ड ह्यान्डलिङ शुल्कमा ५० प्रतिशत छुट दिने निर्णय गरेको हो।

सरकारको निर्णयले नयाँ वायुसेवा कम्पनीलाई आकर्षित गर्न र पोखराबाट अन्तर्राष्ट्रिय उडान विस्तार गर्न सहयोग पुग्ने विश्वास गरिएको छ।

यसैबीच, फ्लाई दुबईले आगामी असोज ७ गतेदेखि पोखरा–दुबई नियमित उडान सुरु गर्ने भएको छ। उक्त उडानले पोखरालाई अन्तर्राष्ट्रिय हवाई सञ्जालसँग जोड्नुका साथै वैदेशिक रोजगारी, अध्ययन र पर्यटन यात्रामा सहजता ल्याउने अपेक्षा गरिएको छ।

तीन वर्षअघि सञ्चालनमा आएको पोखरा अन्तर्राष्ट्रिय विमानस्थलबाट हालसम्म नियमित अन्तर्राष्ट्रिय उडान हुन सकेको थिएन।