गृहमन्त्रीसँग आफ्ना समस्या राख्न नपाएको भन्दै सिंहदरबारको दक्षिण गेटमा धर्ना दिन पुगेका दुई महिलामाथि प्रहरीले बल प्रयोग गरेको छ।

हिंसापीडितका रूपमा लामो समयदेखि न्यायको माग गर्दै आएकी ‘कुमारी आमा’का नामबाट परिचित निहारिका राजपुत र बिनु यादव शनिबार सिंहदरबारको दक्षिण गेटमा धर्नामा बसेका थिए। उनीहरूले गृहमन्त्रीसँग प्रत्यक्ष भेट गरी आफ्ना समस्या सुनुवाइ गर्न पाउनुपर्ने माग गरेका थिए।

धर्नाका क्रममा प्रहरीले उनीहरूलाई हटाउने प्रयास गर्दा लछारपछार भएको प्रत्यक्षदर्शीहरूले बताएका छन्। घटनापछि केही समय उक्त क्षेत्रमा तनावपूर्ण अवस्था सिर्जना भएको थियो।

निहारिका राजपुत र बिनु यादव विगत पाँच दिनदेखि निरन्तर सिंहदरबारको गेटमा पुगेर धर्ना दिँदै आएका छन्। उनीहरूको भनाइअनुसार, सम्बन्धित निकायले आफ्ना मागप्रति चासो नदिएपछि बाध्य भएर धर्ना कार्यक्रम जारी राखिएको हो।

यता प्रहरीले सुरक्षा व्यवस्था कायम राख्न तथा निषेधित क्षेत्रमा धर्ना दिन नदिने नीतिअनुसार उनीहरूलाई हटाइएको जनाएको छ। यसअघि पनि धर्नाका क्रममा प्रहरीले दैनिकजसो उनीहरूलाई हटाउँदै आएको बताइएको छ। दुवै पक्षबाट घटनाबारे औपचारिक प्रतिक्रिया आउन बाँकी रहेको छ।