काठमाडौं — विनाशकारी भूकम्पबाट प्रभावित भेनेजुएलामा मृत्यु हुनेको संख्या ३ हजार ८ सय नाघेपछि संयुक्त राष्ट्रसङ्घ (यूएन) ले राहत तथा पुनःस्थापनाका लागि तत्काल ३० करोड अमेरिकी डलर बराबरको अन्तर्राष्ट्रिय सहयोगको अपिल गरेको छ।

भूकम्पबाट लाखौँ नागरिक प्रभावित भएका छन् भने हजारौँ अझै बेपत्ता र घरबारविहीन अवस्थामा रहेका छन्। संयुक्त राष्ट्रसङ्घका मानवीय सहायता प्रमुख टम फ्लेचरले आगामी छ महिनाभित्र १३ लाख प्रभावित नागरिकलाई अत्यावश्यक सहायता उपलब्ध गराउने लक्ष्यसहित प्रारम्भिक चरणमा ९ करोड ६० लाख डलर आवश्यक रहेको बताएका छन्।

उनले विभिन्न दातृ निकायले सहयोग सुरु गरिसकेको उल्लेख गर्दै थप अन्तर्राष्ट्रिय सहयोग आवश्यक रहेको बताए।

भेनेजुएला सरकारले पनि पुनःनिर्माणका लागि विदेशमा रोक्का गरिएका आफ्ना सम्पत्ति फुकुवा गर्न अन्तर्राष्ट्रिय समुदायसँग आग्रह गरेको छ। विदेशमन्त्री यभान गिलले रोक्का गरिएका कोष पुनःस्थापनाका काममा प्रयोग गर्न उपलब्ध गराउनुपर्ने माग गरेका छन्।

अन्तरिम राष्ट्रपति डेल्सी रोड्रिगेजले बेलायतको बैंक अफ इङ्गल्यान्डमा रहेको करिब ३० टन भेनेजुएली सुन फुकुवा गर्न बेलायती राजा चार्ल्स तृतीयलाई पत्र पठाउने निर्णय गरेको जानकारी दिएका छन्। उक्त सुन भूकम्पपछिको पुनःस्थापनामा प्रयोग गरिने उनको भनाइ छ।

यसैबीच, अमेरिकी सरकारले राहत कार्य सहज बनाउन भेनेजुएलामाथिका केही आर्थिक प्रतिबन्ध चार महिनाका लागि अस्थायी रूपमा हटाएको छ। सन् २०१९ देखि लागू प्रतिबन्धहरू जनवरीमा राष्ट्रपति निकोलस मदुरो सत्ताच्युत भएपछि क्रमशः खुकुलो पारिँदै आएका छन्।

संयुक्त राष्ट्रसङ्घका अनुसार जुन २४ मा आएको ७ दशमलव २ र ७ दशमलव ५ म्याग्निच्युडका शक्तिशाली भूकम्पका कारण भेनेजुएलाको कुल गार्हस्थ्य उत्पादन (जिडिपी) को करिब ६ प्रतिशत बराबर ६ अर्ब ७० करोड अमेरिकी डलरको क्षति भएको छ।

राजधानी काराकासको अन्तर्राष्ट्रिय विमानस्थलसमेत क्षतिग्रस्त भएकाले व्यावसायिक उडान अझै पूर्ण रूपमा सञ्चालनमा आउन सकेको छैन।

सरकारी विवरणअनुसार हालसम्म ३ हजार ८ सय ११ जनाको मृत्यु पुष्टि भएको छ भने करिब १७ हजार मानिस घाइते भएका छन्। ला गुइरा क्षेत्रमा मात्रै करिब १८ हजार मानिस घरबारविहीन भएका छन्।

सबैभन्दा प्रभावित क्षेत्रमा परिवारहरू राहत सामग्रीको प्रतीक्षामा खुला स्थानमा बसिरहेका छन्। उद्धार टोलीहरूले जीवित व्यक्तिको खोजी अभियान अधिकांश क्षेत्रमा समाप्त गरे पनि प्रभावित परिवारहरू अझै भग्नावशेषमा आफन्तको खोजी गरिरहेका छन्।

भूकम्पले ध्वस्त भएका आवासीय भवनहरूमा अहिले भग्नावशेष हटाउने र शव व्यवस्थापनको काम जारी रहेको छ।