प्रतिनिधिसभामा प्रधानमन्त्री र गृहमन्त्रीको खोजी, सुरक्षा परिषद् बैठकमा व्यस्त
काठमाडौं — प्रतिनिधिसभा बैठकमा प्रधानमन्त्री बालेन्द्र शाह र गृहमन्त्री सुधन गुरुङको उपस्थिति माग गर्दै प्रतिपक्षी दलहरूले सरकारको ध्यानाकर्षण गराएका छन्।
सुनसरी घटनालगायत पछिल्ला राजनीतिक अवस्थाबारे प्रधानमन्त्री र गृहमन्त्रीले सदनलाई जानकारी दिनुपर्ने माग गर्दै नेपाली कांग्रेस, नेकपा एमाले, नेपाली कम्युनिस्ट पार्टी, श्रम संस्कृति पार्टी र राप्रपाका सांसदहरूले उनीहरूको खोजी गरेका हुन्।
प्रतिपक्षी दलहरूले सरकारले घटनामा अभिभावकीय भूमिका निर्वाह नगरेको र पछिल्लो अवस्थाबारे मौन बसेको आरोप लगाइरहेका बेला प्रधानमन्त्री शाहले राष्ट्रिय सुरक्षा परिषद्को बैठक बोलाएका छन्।
प्रधानमन्त्रीको सचिवालय सदस्य दीपा दाहालका अनुसार सिंहदरबारमा सुरक्षा परिषद्को बैठक सुरु भएको छ। प्रधानमन्त्रीको सचिवालयले प्रतिनिधिसभा बैठकमा उनको उपस्थिति हुने वा नहुनेबारे तत्काल स्पष्ट जानकारी दिएको छैन।
यसअघि प्रतिपक्षी दलका नेताहरूले सभामुख डोलप्रसाद अर्यालसँग भेट गरी प्रधानमन्त्रीलाई सदनमा उपस्थित भएर पछिल्ला घटनाक्रमबारे जवाफ दिन लगाउन माग गरेका थिए। सभामुखले प्रधानमन्त्रीसँग यस विषयमा छलफल गरेको उनको सचिवालयले जनाएको छ।
तर बिहीबारको प्रतिनिधिसभा बैठककै समयमा सुरक्षा परिषद्को बैठक परेकाले प्रधानमन्त्री सदनमा उपस्थित हुने सम्भावना कम देखिएको छ। प्रतिपक्षी दलहरूले भने पछिल्लो अवस्थालाई लिएर सरकार राज्य सञ्चालनमा कमजोर देखिएको आरोप लगाउँदै आएका छन्।
