काठमाडौं । सरकारले सरकारी सेवाबाट अवकाश, उपदान वा निवृत्तिभरण प्राप्त गरी करारमा कार्यरत कर्मचारीलाई आजदेखि सेवा निरन्तरता नदिई बिदाइ गर्ने निर्णय कार्यान्वयनमा ल्याएको छ।

भूमि व्यवस्था, सहकारी तथा सङ्घीय मामिला मन्त्रालयले सबै सरकारी निकायलाई सातबुँदे परिपत्र जारी गर्दै हाल करारमा कार्यरत कर्मचारीलाई अर्को व्यवस्था नभएसम्म सम्बन्धित निकायमै करार सम्झौतासहित ‘पूल’मा राख्न निर्देशन दिएको हो।

मन्त्रालयले करार कर्मचारीको एकीकृत विवरण अद्यावधिक गर्नेछ भने सङ्गठन तथा व्यवस्थापन (ओ एन्ड एम) सर्वेक्षण स्वीकृत भएपछि आवश्यकताअनुसार पूलमा रहेका कर्मचारीलाई विभिन्न निकायमा खटाइने व्यवस्था गरिएको छ।

नयाँ दरबन्दी वा रिक्त पदमा करार कर्मचारी आवश्यक परे नयाँ व्यक्ति नियुक्त नगरी पूलमा रहेका कर्मचारीलाई सामान्य प्रशासन मन्त्रालयमार्फत माग गरी काममा लगाउनुपर्ने परिपत्रमा उल्लेख छ।

यसअघि मन्त्रिपरिषद्ले असार ३२ गते सङ्गठन तथा व्यवस्थापन सर्वेक्षणबाट प्रभावित मन्त्रालय तथा कार्यालयमा कार्यरत करार कर्मचारीको व्यवस्थापन गर्ने निर्णय गरेको थियो।