देशभर मनसुनी वायुको प्रभाव कायम रहेको जल तथा मौसम विज्ञान विभागले जनाएको छ। हाल मनसुनको न्यून चापीय रेखा सरदर स्थानमा रहेको विभागले बताएको छ।

विभागका अनुसार शुक्रबार दिउँसो देशका हिमाली र पहाडी भू–भागमा सामान्यतया बदली रहनेछ भने तराई क्षेत्रमा आंशिक बदली रहनेछ। हिमाली तथा पहाडी क्षेत्रका केही स्थानमा मेघगर्जन र चट्याङसहित मध्यम वर्षा तथा हिमपातको सम्भावना रहेको छ।

वाग्मती, गण्डकी र लुम्बिनी प्रदेशका तराई क्षेत्रका केही स्थान तथा कोसी, मधेस र सुदूरपश्चिम प्रदेशका तराई भू–भागमा पनि मध्यम वर्षाको सम्भावना रहेको छ।

लुम्बिनी प्रदेशका पहाडी क्षेत्र तथा वाग्मती, गण्डकी र कर्णाली प्रदेशका हिमाली तथा पहाडी क्षेत्रमा एक–दुई स्थानमा भारी वर्षाको सम्भावना रहेको विभागले जनाएको छ। राति पनि देशभर सामान्यतया बदली रही केही स्थानमा वर्षाको सम्भावना रहनेछ।