इरानी आक्रमणपछि कुवेतको विद्युत्–पानी पूर्वाधारमा क्षति, खानेपानी आपूर्तिमा चिन्ता
कुवेती अधिकारीहरूका अनुसार शुक्रबार भएको आक्रमणमा विद्युत् केन्द्रका केही एकाइमा क्षति पुग्नुका साथै परिसरमा आगलागी भएको थियो। आगो नियन्त्रणमा लिइसकिएको र अत्यावश्यक सेवाहरू सञ्चालनमा राख्न आपतकालीन व्यवस्था लागू गरिएको जनाइएको छ।
कुवेतको करिब ९० प्रतिशत खानेपानी डिसालिनेसन केन्द्रबाट आपूर्ति हुने भएकाले यस्ता पूर्वाधारमा हुने आक्रमणले लाखौँ नागरिक प्रभावित हुन सक्ने विज्ञहरूको चेतावनी छ। ओमान र साउदी अरेबिया पनि समुद्री पानी प्रशोधन प्रणालीमा अत्यधिक निर्भर छन्।
क्षेत्रीय तनाव बढ्दै जाँदा ऊर्जा बजार र होर्मुज जलडमरूमध्यसँगै जल पूर्वाधारको सुरक्षा पनि महत्वपूर्ण चुनौती बनेको विश्लेषण गरिएको छ। विगतमा पनि खाडी क्षेत्रका डिसालिनेसन केन्द्रहरू द्वन्द्वको प्रभावमा परेका थिए।
