प्योङयाङ । चीनका राष्ट्रपति सी जिनपिङ सात वर्षपछि पहिलोपटक उत्तर कोरियाको राजधानी प्योङयाङ पुगेका छन्। दुईदिने राजकीय भ्रमणका क्रममा उनले उत्तर कोरियाली नेता किम जोङ उनसँग द्विपक्षीय सम्बन्ध, आर्थिक सहकार्य र क्षेत्रीय सुरक्षाका विषयमा उच्चस्तरीय वार्ता गर्ने कार्यक्रम रहेको छ।

चिनियाँ सरकारी समाचार संस्था सिन्ह्वाका अनुसार राष्ट्रपति सीसँग उनकी पत्नी पेङ लियुआन, विदेशमन्त्री वाङ यी तथा चिनियाँ कम्युनिष्ट पार्टीका वरिष्ठ अधिकारीहरू पनि भ्रमण टोलीमा सहभागी छन्। गत वर्ष बेइजिङमा भएको भेटपछि सी र किमबीचको यो पहिलो औपचारिक शिखर वार्ता हो।

विश्लेषकहरूका अनुसार भ्रमणको मुख्य उद्देश्य चीन–उत्तर कोरिया सम्बन्धलाई थप सुदृढ बनाउनु, आर्थिक सहयोग विस्तार गर्नु तथा क्षेत्रीय सुरक्षा अवस्थाबारे साझा धारणा बनाउनु रहेको छ। अमेरिका तथा पश्चिमी शक्तिसँग दुवै देशको सम्बन्ध तनावपूर्ण रहँदा पुरानो रणनीतिक साझेदारीलाई पुनर्जीवित गर्ने प्रयासका रूपमा पनि यो भ्रमणलाई हेरिएको छ।

चीन लामो समयदेखि उत्तर कोरियाको प्रमुख आर्थिक साझेदार र कूटनीतिक समर्थक रहँदै आएको छ। यद्यपि पछिल्ला वर्षहरूमा उत्तर कोरियाले रुससँगको सम्बन्ध तीव्र रूपमा विस्तार गरेपछि बेइजिङको प्रभाव घट्दै गएको विश्लेषण सार्वजनिक हुँदै आएका थिए। यस्तो अवस्थामा सीको भ्रमणलाई चीनले आफ्नो परम्परागत प्रभाव पुनः स्थापित गर्न खोजेको संकेतका रूपमा लिइएको छ।

उत्तर कोरियाको सरकारी पत्रिका रोडोङ सिनमुनमा प्रकाशित लेखमा सी जिनपिङले दुवै देशबीचको रणनीतिक सहकार्यलाई अझ मजबुत बनाउँदै बहुध्रुवीय विश्व व्यवस्थाको निर्माणमा मिलेर काम गर्नुपर्ने बताएका छन्।

भ्रमणका क्रममा आर्थिक सहयोग, खाद्यान्न तथा मल आपूर्ति, पर्यटन विस्तार र संयुक्त आर्थिक परियोजनाबारे पनि छलफल हुन सक्ने अनुमान गरिएको छ। साथै उत्तर कोरियाको आणविक कार्यक्रम र कोरियाली प्रायद्वीपको सुरक्षा अवस्थाबारे समेत कुराकानी हुने अपेक्षा गरिएको छ।

विश्लेषकहरूका अनुसार सी जिनपिङको यो भ्रमण केवल द्विपक्षीय सम्बन्धको विषय मात्र नभई उत्तरपूर्वी एसियामा बदलिँदो शक्ति सन्तुलन र क्षेत्रीय कूटनीतिक समीकरणसँग पनि प्रत्यक्ष रूपमा जोडिएको महत्वपूर्ण घटना हो।