काभ्रेपलाञ्चोक, १९ जेठ । जिल्ला प्रहरी कार्यालय काभ्रेपलाञ्चोकले विभिन्न मुद्दामा अदालतबाट सजाय तोकिएपछि फरार रहेका ६ जना प्रतिवादीलाई पक्राउ गरेको छ।

जिल्ला प्रहरी कार्यालय काभ्रेपलाञ्चोक र इलाका प्रहरी कार्यालय बनेपाबाट खटिएको संयुक्त टोलीले विभिन्न मितिमा उनीहरूलाई पक्राउ गरेको हो।

पक्राउ पर्नेहरूमा दुई जना चोरी मुद्दा, एक जना अभद्र व्यवहार, एक जना लागुऔषध मुद्दा तथा एक जना वैदेशिक/बैंकिङ कसुर सम्बन्धी मुद्दामा सजाय पाएका व्यक्ति रहेका छन्।

जिल्ला प्रहरी कार्यालय काभ्रेपलाञ्चोकका सूचना अधिकारी प्रहरी नायब उपरीक्षक (डीएसपी) रविन विष्टका अनुसार पक्राउ पर्नेहरूमा बनेपा–८ का २२ वर्षीय सुरज काफ्ले (अभद्र व्यवहारमा २६ दिन कैद), बनेपा–११ का ३३ वर्षीय रुपक अधिकारी (चोरीमा ५ महिना ५ दिन कैद), चौतारा साँगाचोकगढी–९ घर भई हाल काठमाडौं–३२ बस्ने २७ वर्षीय रमेश श्रेष्ठ (बैंकिङ कसुरमा २ वर्ष कैद), नमोबुद्ध–६ का २६ वर्षीय अनिल तामाङ भन्ने इन्द्र लाल तामाङ (लागुऔषध मुद्दामा २ महिना ४ दिन कैद), बनेपा–८ का ३७ वर्षीय विवस मानन्धर (चोरीमा ५ महिना ३ दिन कैद) र ललितपुर महानगरपालिका–२० घर भई हाल बनेपा–८ बस्ने ३६ वर्षीय साजन शाक्य रहेका छन्।

उनीहरूलाई पक्राउ गरी काभ्रेपलाञ्चोक जिल्ला अदालतबाट ७ दिनको म्याद थप गरिएको प्रहरीले जनाएको छ।

प्रहरीका अनुसार पक्राउ परेकाहरूमाथि कुल ३ वर्ष ६ महिना ७ दिन कैद र ८ लाख १२ हजार रुपैयाँ जरिवाना असुल हुन बाँकी रहेको छ।

प्रहरीले फरार प्रतिवादी पक्राउ अभियानलाई निरन्तर रूपमा अघि बढाइरहेको जनाएको छ।