पोखरा अन्तर्राष्ट्रिय विमानस्थलबाट संयुक्त अरब इमिरेट्स (यूएई) को दुबईका लागि नियमित अन्तर्राष्ट्रिय उडान सञ्चालन हुने भएको छ। आगामी असोज ७ गतेदेखि दैनिक उडान सुरु हुने भएपछि पर्यटन व्यवसायीहरू उत्साहित बनेका छन्।

दुबईस्थित वायुसेवा कम्पनी Flydubai ले उक्त मितिदेखि नियमित उडान सञ्चालन गर्ने गरी टिकट बुकिङ खुला गरिसकेको छ। यससँगै Pokhara International Airport बाट पहिलो पटक नियमित अन्तर्राष्ट्रिय व्यावसायिक उडान सञ्चालन हुने भएको हो।

विमानस्थल सञ्चालनमा आएको करिब तीन वर्षपछि नियमित अन्तर्राष्ट्रिय उडान सुनिश्चित हुनु पोखराका लागि महत्वपूर्ण उपलब्धि मानिएको छ। यसअघि यहाँबाट चीन, भुटान लगायतका मुलुकमा चार्टर उडान तथा भारततर्फ आकस्मिक मेडिकल उडान मात्र हुँदै आएका थिए।

पोखरा महानगरपालिकाका प्रमुख धनराज आचार्यले दुबई उडानलाई पोखराको अन्तर्राष्ट्रिय पहिचान विस्तार गर्ने महत्वपूर्ण उपलब्धिका रूपमा व्याख्या गरेका छन्। उनका अनुसार यो केवल हवाई सेवा विस्तार मात्र नभई पर्यटन प्रवर्द्धन, लगानी आकर्षण तथा काठमाडौँ केन्द्रित हवाई चाप घटाउने अवसर पनि हो।

होटल सङ्घ नेपालका प्रतिनिधिहरूले संयुक्त अरब इमिरेट्स (यूएई) सँगको सिधा हवाई सम्पर्कले पर्यटन, व्यापार तथा जनस्तरको सम्बन्ध विस्तारमा ठूलो योगदान पुग्ने विश्वास व्यक्त गरेका छन्। पोखरा पर्यटन परिषद् र महिला पर्यटन व्यवसायी मञ्च (ओटेफ) का प्रतिनिधिहरूले समेत यो उडानले पोखराको पर्यटन उद्योगलाई नयाँ ऊर्जा दिने बताएका छन्।

दैनिक उडान सञ्चालनसँगै गण्डकी प्रदेश तथा आसपासका जिल्लाबाट वैदेशिक रोजगारीमा जाने युवा, उच्च शिक्षाका लागि विदेश जाने विद्यार्थी तथा अन्य यात्रुहरू प्रत्यक्ष रूपमा लाभान्वित हुने अपेक्षा गरिएको छ।

सन् २०२३ जनवरी १ मा उद्घाटन गरिएको Pokhara International Airport बाट नियमित अन्तर्राष्ट्रिय व्यावसायिक उडान सुरु भएपछि पोखरा मुलुकको दोस्रो प्रमुख अन्तर्राष्ट्रिय हवाई प्रवेशद्वारका रूपमा थप स्थापित हुने विश्वास गरिएको छ।

Flydubai ले यात्रुहरूले कम्पनीको आधिकारिक वेबसाइट तथा मान्यता प्राप्त ट्राभल एजेन्सीमार्फत टिकट बुकिङ गर्न सक्ने जनाएको छ।