काठमाडौं । फुटबलको सबैभन्दा ठूलो प्रतियोगिता फिफा विश्वकप २०२६ आज (जुन ११) देखि सुरु हुँदैछ। आगामी ३९ दिनसम्म चल्ने विश्वकपले विश्वभरका फुटबल समर्थकलाई रोमाञ्चित बनाउने अपेक्षा गरिएको छ।

यसपटकको विश्वकप संयुक्त रूपमा संयुक्त राज्य अमेरिका, क्यानडा र मेक्सिको मा आयोजना हुँदैछ। प्रतियोगितामा ४८ राष्ट्र सहभागी हुनेछन् भने कुल १०४ खेल खेलाइनेछ। विश्वकपको उपाधि भिडन्त जुलाई १९ मा MetLife Stadium मा हुनेछ।

विश्वकप विदेशमा आयोजना भए पनि नेपालमा यसको उत्साह कम छैन। प्रतियोगिता सुरु भएसँगै राजधानी काठमाडौंसहित विभिन्न सहरका बजारमा विश्वकप सहभागी राष्ट्रहरूको जर्सी किन्ने समर्थकको भीड बढ्न थालेको छ।

फुटबल प्रेमीहरू आफ्नो मनपर्ने टोली र खेलाडीको जर्सी खरिद गरी सामाजिक सञ्जालमा तस्बिर तथा भिडियो साझा गरिरहेका छन्। बजारमा उपलब्ध जर्सीको मूल्य गुणस्तरअनुसार फरक–फरक रहेको व्यवसायीहरू बताउँछन्। सामान्य जर्सी तीन–चार सय रुपैयाँदेखि सुरु हुने भने उच्च गुणस्तरका जर्सी तीन–चार हजार रुपैयाँसम्ममा बिक्री भइरहेको छ।

विश्वकपको माहोल बढ्दै जाँदा नेपाली फुटबल समर्थकहरू पनि आफ्नो मनपर्ने टोलीलाई समर्थन गर्न तयारीमा जुटेका छन्। प्रतियोगिता अवधिभर जर्सी, झण्डा र अन्य फुटबल सामग्रीको व्यापार थप बढ्ने अनुमान गरिएको छ।