काठमाडौं — प्रमुख राजनीतिक दल नेपाली कांग्रेस ले नयाँ क्रियाशील सदस्यता आवेदन खुला गरेको छ।

सोमबार बसेको पार्टीको सदस्यता व्यवस्थापन केन्द्रीय समितिको बैठकले नयाँ सदस्यता खुला गर्ने निर्णय गरेको हो। बैठक समितिका संयोजक तथा महामन्त्री प्रदीप पौडेलको अध्यक्षतामा बसेको थियो।

पार्टीका कार्यवाहक मुख्य सचिव कृष्णप्रसाद दुलालका अनुसार बैठकले नयाँ क्रियाशील सदस्यताका लागि औपचारिक आह्वान गर्ने निर्णय गरेको छ।

कांग्रेसले जारी गरेको सूचनामा नेपालको संविधान, पार्टीको विधान, नियमावली र अनुशासन पालना गर्ने प्रतिबद्धता जनाउने योग्य नेपाली नागरिकले सदस्यता लिन सक्ने उल्लेख गरिएको छ।

पार्टीले स्वदेश तथा विदेशमा रहेका इच्छुक व्यक्तिहरूलाई नेपाली कांग्रेसको आधिकारिक वेबसाइटमार्फत अनलाइन आवेदन दिन सकिने व्यवस्था गरेको छ।

सूचनामा भनिएको छ, “योग्य नेपाली नागरिकले पार्टीको वेवसाइटमार्फत सहज र सरल रूपमा क्रियाशील सदस्यता आवेदन फारम भर्न सकिने गरी प्रक्रिया खुला गरिएको छ।”

यस निर्णयसँगै पार्टीले नयाँ सदस्यता विस्तार गर्दै संगठन सुदृढीकरण गर्ने लक्ष्य लिएको जनाएको छ।