वासिङ्टन । अमेरिकी राष्ट्रपति डोनाल्ड ट्रम्पले इरानसँग जारी वार्तामा आफ्ना वार्ताकारहरूलाई कुनै पनि सम्झौतामा हतार नगर्न निर्देशन दिएका छन्। वार्ता लगभग अन्तिम चरणमा पुगेको चर्चा चलिरहेका बेला ट्रम्पको यस्तो भनाइ सार्वजनिक भएको हो।

इरान र अमेरिकाबीचको वार्तामा सहमति नजिक पुगेको र प्रस्तावित सम्झौता इरानको पक्षमा बढी अनुकूल रहेको दाबी विभिन्न अन्तर्राष्ट्रिय सञ्चारमाध्यमहरूले गरेका छन्। तर, यसैबीच ट्रम्प प्रशासनले थप सावधानी अपनाउँदै सम्झौतामा अझै कडाइ गर्ने संकेत दिएको छ।

रिपोर्टअनुसार दुई देशबीच भइरहेको छलफलमा ६० दिनको युद्धविराम विस्तार गर्ने, स्ट्रेट अफ होर्मुज पुनः खोल्ने तथा इरानको आणविक कार्यक्रमबारे थप विस्तृत वार्ता अघि बढाउने विषयहरू समावेश छन्।

राष्ट्रपति ट्रम्पले सामाजिक सञ्जाल ‘ट्रुथ सोसल’मा लेख्दै वार्ता सकारात्मक दिशामा अघि बढिरहेको भए पनि दुवै पक्षले पर्याप्त समय लिएर मात्र अन्तिम निष्कर्षमा पुग्नुपर्ने बताएका छन्। उनले यसअघि शनिबार मात्रै धेरै विषयमा सहमति भइसकेको संकेत दिएका थिए, जसले छिट्टै औपचारिक घोषणा हुन सक्ने अनुमान गरिएको थियो।

ट्रम्पले पूर्वराष्ट्रपति बाराक ओबामाको कार्यकालमा भएको इरान सम्झौताभन्दा फरक र आफूअनुकूल नयाँ सम्झौता गर्न खोजिरहेको पनि दोहोर्‍याएका छन्। उनले ओबामाको सम्झौताले इरानलाई आर्थिक लाभ र आणविक कार्यक्रम विस्तारको बाटो दिएको आरोप लगाएका छन्।

उनका अनुसार अहिले तयार भइरहेको सम्झौता त्यसको ठीक विपरीत हुनेछ र “न्यायपूर्ण र राम्रो” हुनेछ। ट्रम्पले आलोचकहरूलाई लक्षित गर्दै वार्ताको वास्तविक अवस्था नबुझी टिप्पणी नगर्न पनि आग्रह गरेका छन्।

ट्रम्पले अन्त्यमा भनेका छन्, “म कहिल्यै नराम्रो सम्झौता गर्दिनँ।”