काठमाडौँ — अमेरिकी विदेशमन्त्री मार्को रुबियोले इरानसँग सम्भावित सम्झौता आइतबारपछि सार्वजनिक हुन सक्ने संकेत दिएका छन्। उनका अनुसार उक्त सम्झौताले मध्यपूर्वमा जारी तनाव र युद्धलाई औपचारिक रूपमा अन्त्य गर्ने दिशामा महत्त्वपूर्ण भूमिका खेल्न सक्छ।

भारतको नयाँ दिल्लीमा पत्रकारहरूसँग कुरा गर्दै रुबियोले आगामी केही घण्टाभित्रै विश्वले सकारात्मक समाचार सुन्न सक्ने सम्भावना रहेको बताएका हुन्। उनले प्रस्तावित सहमतिले अमेरिकी राष्ट्रपति डोनाल्ड ट्रम्पको स्ट्रेट अफ हर्मुजसम्बन्धी चासोलाई सम्बोधन गर्ने दाबी गरे।

उनका अनुसार इरान–अमेरिका–इजरायलबीचको तनावपछि आंशिक रूपमा अवरुद्ध भएको स्ट्रेट अफ हर्मुज पुनः सहज बनाउन प्रयास भइरहेको छ। सम्भावित सम्झौताले इरानको आणविक हतियारसम्बन्धी चिन्ता कम गर्ने प्रक्रिया अघि बढाउन सक्ने उनले उल्लेख गरे।

यसैबीच राष्ट्रपति ट्रम्पले पनि स्ट्रेट अफ हर्मुज खोल्ने विषयमा छलफल “धेरै अघि बढिसकेको” बताएका छन्। उनले सामाजिक सञ्जालमार्फत अमेरिका, इरान र अन्य पक्षबीच अन्तिम सम्झौता नजिक पुगेको दाबी गरेका छन्।

तर प्रस्तावित सहमतिले अमेरिकी राजनीतिक वृत्तमा विवाद पनि निम्त्याएको छ। सिनेटर टेड क्रुज र पूर्वविदेशमन्त्री माइक पोम्पेओजस्ता नेताहरूले इरानलाई आर्थिक तथा रणनीतिक लाभ पुग्ने भन्दै आपत्ति जनाएका छन्।

क्रुजले सम्भावित सम्झौतालाई “विनाशकारी गल्ती” हुने चेतावनी दिएका छन्। यता रुबियोले इरानविरुद्ध चलाइएको ‘अपरेसन एपिक फ्युरी’ अभियानले देशको नौसेना क्षमता कमजोर बनाएको दाबी गरेका छन्।

उनका अनुसार अभियानले इरानको ब्यालेस्टिक क्षेप्यास्त्र क्षमतामा पनि ठूलो असर पारेको छ र रक्षा–औद्योगिक संरचनामा क्षति पुर्‍याएको छ।

सम्भावित सम्झौताबारे औपचारिक विवरण सार्वजनिक भएपछिमात्र यसको वास्तविक स्वरूप स्पष्ट हुने अपेक्षा गरिएको छ।