क्वेटा — पाकिस्तानको दक्षिण–पश्चिमी प्रान्त ब्लुचिस्तानको राजधानी क्वेटास्थित रेलवे ट्र्याकमा भएको शक्तिशाली बम विस्फोटमा कम्तीमा २४ जनाको मृत्यु भएको छ भने ८२ भन्दा बढी घाइते भएका छन्। अन्तर्राष्ट्रिय सञ्चारमाध्यम Al Arabiya ले उक्त जानकारी सार्वजनिक गरेको हो।

घटनापछि घाइतेहरूको संख्या बढ्दै गएको बताइएको छ। चिनियाँ समाचार संस्था Xinhua News Agency का अनुसार घटनामा ८२ भन्दा बढी व्यक्ति घाइते भएका छन्।

साथै, Al Jazeera ले जनाए अनुसार विस्फोटका कारण एउटा मालवाहक रेल लिकबाट बाहिर उछिट्टिएको थियो। विस्फोटपछि सो क्षेत्रमा गोली हानाहान समेत भएको रिपोर्ट गरिएको छ, जसले घटनालाई थप तनावपूर्ण बनाएको छ।

स्थानीय प्रहरीका अनुसार विस्फोटमा सैन्य कर्मचारीहरू सवार रेललाई लक्षित गरिएको प्रारम्भिक अनुमान गरिएको छ। विस्फोटका कारण रेलमा आंशिक क्षति पुगेको छ।

घटनास्थल नजिक पार्किङमा राखिएका करिब १० वटा सवारीसाधन पनि विस्फोटको असरले क्षतिग्रस्त भएका छन्। विस्फोटको शक्तिशाली झट्काले आसपासका भवनका झ्याल र सिसाका प्यानलहरू फुटेका छन्।

पाकिस्तानी सञ्चारमाध्यम Geo News का अनुसार घटनापछि क्षेत्रमा ठूलो क्षति भएको छ र सुरक्षा निकायहरूले अनुसन्धान तथा उद्धार कार्य तीव्र पारेका छन्।

अधिकारीहरूले घटनालाई सम्भावित लक्षित आक्रमणका रूपमा अनुसन्धान गरिरहेका छन्।