काठमाडौँ, चैत — नेपाली नयाँ वर्ष २०८३ को अवसरमा संघीय राजधानीको प्रमुख पर्यटकीय केन्द्र ठमेलमा ‘ठमेल सडक महोत्सव’ आयोजना गरिने भएको छ। ठमेल पर्यटन विकास परिषद्को आयोजनामा हुने यो महोत्सवको उद्देश्य नेपाली नयाँ वर्षलाई अन्तर्राष्ट्रिय स्तरमा प्रवर्द्धन गर्नु रहेको छ।

परिषद्का उपाध्यक्ष सहदेव धमला (विमल)का अनुसार महोत्सव ठमेलस्थित त्रिदेवीमार्गमा आयोजना गरिनेछ। उनले नयाँ वर्षको पूर्वसन्ध्यामा ठमेललाई सांस्कृतिक तथा पर्यटकीय आकर्षणको केन्द्र बनाउने उद्देश्यले कार्यक्रम गर्न लागिएको जानकारी दिए।

महोत्सवअन्तर्गत सडकमा ३२ वटा स्टल स्थापना गरी विभिन्न प्रकारका खाना तथा स्थानीय उत्पादनहरूको प्रदर्शनी र बिक्री गरिनेछ। साथै मौलिक सांस्कृतिक कार्यक्रमहरू समेत प्रस्तुत गरिनेछन्।

साँझ ६ बजेदेखि सुरु हुने सांस्कृतिक कार्यक्रममार्फत नयाँ वर्षलाई स्वागत गरिनेछ भने महोत्सव राति १२:३० बजे समापन हुने परिषद्ले जनाएको छ।

नेपाल आउने विदेशी पर्यटकमध्ये करिब ८० प्रतिशत ठमेल क्षेत्र भ्रमण गर्ने गरेको तथ्यलाई ध्यानमा राख्दै यस सडक महोत्सवमा ठूलो संख्यामा आन्तरिक तथा बाह्य पर्यटकको सहभागिता हुने अपेक्षा गरिएको छ।