श्रम संस्कृति पार्टीका उम्मेदवार ६ क्षेत्रमा अग्रता, अध्यक्ष हर्क साम्पाङ भने सुनसरी–१ मा पछि
धरान । धरान उपमहानगरपालिकाका पूर्वमेयर हर्क साम्पाङले स्थापना गरेको श्रम संस्कृति पार्टीले प्रतिनिधिसभा निर्वाचनको प्रारम्भिक मतपरिणाममा कोशी प्रदेशका ६ क्षेत्रमा अग्रता बनाएको छ।
बिहीबार सम्पन्न निर्वाचनपछि जारी मतगणनाको प्रारम्भिक परिणामअनुसार पार्टीका उम्मेदवारहरू भोजपुर, पाँचथर, इलाम–२, खोटाङ, उदयपुर–२ र धनकुटा गरी ६ निर्वाचन क्षेत्रमा अघि रहेका छन्।
तर पार्टीका अध्यक्ष साम्पाङ स्वयं भने सुनसरी क्षेत्र नम्बर १ मा पछि परेका छन्। उक्त क्षेत्रमा राष्ट्रिय स्वतन्त्र पार्टीकी उम्मेदवार शरिन तामाङसँग साम्पाङ करिब ७ सय मतले पछि रहेको प्रारम्भिक मतगणनाले देखाएको छ।
धरान उपमहानगरपालिकाको मेयर पदबाट राजीनामा दिएपछि परम्परागत राजनीतिक दलहरूको विकल्प बन्ने उद्देश्यसहित साम्पाङले श्रम संस्कृति पार्टी गठन गरेका थिए।
प्रारम्भिक मतपरिणामअनुसार श्रम संस्कृति पार्टीका उम्मेदवारहरू निम्न क्षेत्रमा अघि रहेका छन्:
ध्रुबराज राई — भोजपुर (४६७ मतले अग्रता)
हस्तराज शेर्मा — पाँचथर (६५६ मतले अग्रता)
सुदीप राई — इलाम–२ (१,५०४ मतले अग्रता)
एरेन राई — खोटाङ (३९५ मतले अग्रता)
बलराज राई — उदयपुर–२ (४९८ मतले अग्रता)
सनबहादुर राई — धनकुटा (३,२३७ मतले अग्रता)
श्रम संस्कृति पार्टीले आफ्नो घोषणापत्रमा प्रत्यक्ष निर्वाचित कार्यकारी राष्ट्रपति प्रणाली लागू गर्ने प्रस्ताव अघि सारेको छ। पार्टीले राष्ट्रपतिको कार्यकाल पाँच वर्षको हुने र अधिकतम दुई कार्यकालसम्म मात्र पदमा रहन पाउने व्यवस्था प्रस्ताव गरेको छ।
त्यसैगरी प्रतिनिधिसभामा पूर्ण समानुपातिक निर्वाचन प्रणाली लागू गर्ने तथा राज्यका विभिन्न निकायमा आदिवासी, जनजाति, खस आर्य, मधेसी, दलित र मुस्लिम समुदायको समानुपातिक प्रतिनिधित्व सुनिश्चित गर्ने नीति पनि पार्टीले अघि सारेको छ।
मतगणना जारी रहेकाले अन्तिम परिणाम आउन बाँकी रहेको निर्वाचन आयोगले जनाएको छ।
