पश्चिमी भारतीय राज्य महाराष्ट्रको नागपुरमा आइतबार एक कारखानामा भएको विस्फोटमा परी कम्तीमा १८ जनाको मृत्यु भएको छ भने २० जना घाइते भएको बताइएको छ ।

उद्धार कार्य चलिरहेको अधिकारीले बताएका छन् । प्रधानमन्त्री नरेन्द्र मोदीले उक्त दुर्घटनामा ‘गहिरो दुःख’ व्यक्त गर्दै घाइतेहरूको शीघ्र स्वास्थ्य लाभको कामना गरेका छन् । महाराष्ट्रका मुख्यमन्त्री देवेन्द्र फड्नविसले पनि एक्समा घटनालाई ‘अत्यन्त दुर्भाग्यपूर्ण र दुःखद्’ बताएका छन् । 

मुम्बईबाट करिब ८ सय किलोमिटर टाढाको नागपुरमा भएको उक्त घटनाको पूर्ण अनुसन्धानका लागि आदेश दिइएको छ । यस घटनाले भारतमा औद्योगिक सुरक्षा उपायको महत्त्व पुनः स्मरण गराएको छ ।

गत वर्ष पनि पश्चिम भारतमा आतसबाजी कारखानामा भएको विस्फोटमा २१ जनाको ज्यान गएको थियो । यसअघि, शनिबार दक्षिणपूर्वी भारतीय राज्य आन्ध्र प्रदेशको पटाका कारखानामा भएको विस्फोटमा परी २१ जनाको ज्यान गएको थियो ।