१० फागुन, काठमाडौं । अमेरिकी राष्ट्रपति डोनाल्ड ट्रम्पले ग्रिनल्याण्डका बासिन्दाको उपचारका लागि विशाल ‘हस्पिटल शिप’ पठाउने घोषणा गरेका छन्। यस कदमलाई उनले मानवीय सहायता भने पनि यसले डेनमार्कसँगको कूटनीतिक तनाव थप चर्काएको छ।

राष्ट्रपति ट्रम्पले सामाजिक सञ्जाल ‘ट्रुथ सोसल’मार्फत ग्रिनल्याण्डमा धेरै मानिस बिरामी रहेको र पर्याप्त उपचार नपाएको दाबी गर्दै अस्पताल जहाज पठाइएको बताएका छन्। यो मिशन लुजियानाका गभर्नर तथा ग्रिनल्याण्डका लागि अमेरिकी विशेष दूत जेफ ल्यान्ड्रीसँगको समन्वयमा अघि बढाइएको जनाइएको छ।

सन् २०२५ को अन्त्यदेखि ट्रम्पले ग्रिनल्याण्डलाई अमेरिकामा गाभ्ने इच्छा सार्वजनिक रूपमा व्यक्त गर्दै आएका छन्। यसअघि उनले ग्रिनल्याण्ड नदिए डेनमार्कमाथि भारी भन्सार शुल्क लगाउने चेतावनीसमेत दिएका थिए। तर डेनमार्क र ग्रिनल्याण्डका अधिकारीहरूले “ग्रिनल्याण्ड बिक्रीका लागि होइन” भन्दै उक्त प्रस्ताव अस्वीकार गर्दै आएका छन्।

अमेरिकी अस्पताल जहाज पठाउने निर्णय कुन आधारमा गरिएको हो र डेनमार्क सरकारबाट अनुमति लिइएको छ वा छैन भन्ने विषयमा डेनमार्कले अहिलेसम्म आधिकारिक धारणा सार्वजनिक गरेको छैन।

विज्ञहरूले यो कदमलाई ग्रिनल्याण्डमा अमेरिकी प्रभाव विस्तार गर्ने ‘सफ्ट पावर’ रणनीतिका रूपमा विश्लेषण गरेका छन्। सन् २०२६ को सुरुवातमै ट्रम्पले ग्रिनल्याण्ड नियन्त्रणका लागि बल प्रयोग गर्न सक्ने संकेत दिएपछि नेटो सहयोगी राष्ट्रहरूबीच चासो र चिन्ता बढेको बताइएको छ।