स्वास्थ्यमन्त्री शर्माद्वारा पशुपति होमियोप्याथिक अस्पतालको स्थलगत अनुगमन
स्वास्थ्य तथा जनसंख्यामन्त्री डा. सुधा शर्मा गौतमले ललितपुरस्थित मानसिक अस्पताल र पशुपति होमियोप्याथिक अस्पतालको स्थलगत अनुगमन गरेकी छन् ।
अनुगमनका क्रममा उनले दुवै अस्पतालको भौतिक पूर्वाधार, सेवा प्रवाहको अवस्था तथा बिरामीहरूको पहुँचबारे विस्तृत जानकारी लिइन् ।
अनुगमनका दौरानमा अस्पताल प्रशासनसँग भएको छलफलमा मन्त्री गौतमले स्वास्थ्य सेवालाई अझ प्रभावकारी, गुणस्तरीय र बिरामीमैत्री बनाउन आवश्यक सुधारका कदम चाल्नुपर्नेमा जोड दिइन् । उनले सेवा प्रवाहमा देखिएका कमजोरी पहिचान गरी तत्काल सुधारका योजना बनाउन निर्देशन पनि दिइन् ।
अनुगमनपछि मन्त्री गौतम र ललितपुर महानगरपालिकाका प्रमुख चिरीबाबु महर्जनबीच जनस्वास्थ्यका एजेन्डामा केन्द्रित विशेष भेटघाट सम्पन्न भएको छ ।
भेटघाटमा विशेषगरी स्वास्थ्य बीमा कार्यक्रमलाई आम नागरिकको पहुँचसम्म पुर्याउन महानगरपालिकाले गरिरहेका प्रयासहरू र आगामी दिनमा मन्त्रालय तथा स्थानीय सरकारबीच हुन सक्ने नीतिगत तथा व्यावहारिक सहकार्यका विषयमा गहिरो छलफल भएको बताइएको छ ।
मन्त्री गौतमले संघ, प्रदेश र स्थानीय तहबीचको सहकार्य बलियो बनाएर मात्रै सर्वसुलभ र गुणस्तरीय स्वास्थ्य सेवा सुनिश्चित गर्न सकिने उल्लेख गरिन् ।
साथै, महानगरपालिकासँगको समन्वयमार्फत स्वास्थ्य बीमा र प्राथमिक स्वास्थ्य सेवाको पहुँच विस्तार गरिने प्रतिबद्धता पनि व्यक्त गरिन् ।
