सल्यान, १४ फागुन २०८२। आसन्न प्रतिनिधि सभा निर्वाचनलाई लक्षित गर्दै नेशनल रिपब्लिक नेपाल सल्यानले आफ्नो चुनावी अभियानलाई जिल्लाभर व्यापक बनाएको छ। सल्यान जिल्लाका सबै विभिन्न स्थानीय तहका पालिकाहरूमा पार्टीले घरदैलो तथा मतदाता भेटघाट कार्यक्रम सञ्चालन गरेको छ। निर्वाचनको मिति नजिकिँदै गर्दा पार्टीले आफ्नो सङ्गठन परिचालनलाई वडा र टोल तहसम्म पुर्‍याउँदै चुनावी सरगर्मी बढाएको हो।

जिल्लाको मुख्य प्रशासनिक तथा व्यापारिक केन्द्र शारदा नगरपालिका-२ को खलङ्गा र श्रीनगर इलाकामा भएको घरदैलो कार्यक्रममा प्रतिनिधि सभा सदस्य पदका उम्मेदवार डिल्ली बहादुर घर्ती मगर आफैँ सहभागी हुनुभएको थियो। कर्णाली प्रदेश कमिटीका अध्यक्ष पुष्कर बबालको नेतृत्वमा खटिएको टोलीले बिहानदेखि साझँसम्म मतदाताका घर-घर पुगेर प्रत्यक्ष संवाद गरेको छ। यसअघि नै प्रतिबद्धता पत्र सार्वजनिक गरिसकेको पार्टीले घरदैलो अभियानमा ती योजनाहरू कार्यान्वयन गर्ने ठोस आधारबारे मतदातालाई प्रस्ट पारेको छ।

घरदैलोका क्रममा उम्मेदवार घर्ती मगरले समान मानव अस्तित्व, जल-जमिन-जंगल तथा प्राकृतिक स्रोतको संरक्षण र आत्मनिर्भर अर्थतन्त्र निर्माणलाई आफ्नो मुख्य चुनावी एजेन्डा बनाउनुभएको छ। उहाँले निःशुल्क शिक्षा र स्वास्थ्य, युवा स्वरोजगार सिर्जना, सुशासन स्थापना तथा भ्रष्टाचार नियन्त्रणका लागि आफ्नो उम्मेदवारी रहेको बताउनुभयो। साथै, राष्ट्रिय उद्योगको प्रवर्द्धन र पूर्ण समानुपातिक एवं समावेशी निर्वाचन प्रणालीको कार्यान्वयनमा पार्टी सधैँ अडिग रहने प्रतिबद्धता उहाँले दोहोर्‍याउनुभएको छ।

जिल्लाका पालिकाहरुमा सञ्चालित यो अभियानका क्रममा स्थानीय मतदाताले विकास, रोजगारी र आधारभूत सेवामा सुधारका विषयमा विभिन्न जिज्ञासाहरू राखेका थिए। मतदाताका प्रश्नहरूको सम्बोधन गर्दै उम्मेदवार घर्ती मगरले सल्यानको समग्र समृद्धिका लागि आफू प्रतिबद्ध रहेको र जनताका समस्यालाई सदनमा बुलन्द गर्ने आश्वासन दिनुभयो। घरदैलोमा देखिएको जनसहभागिताले पार्टीको पक्षमा सकारात्मक माहोल सिर्जना भएको दाबी पार्टी पंक्तिले गरेको छ।

अन्त्यमा, नेशनल रिपब्लिक नेपालले सल्यान जिल्लाभर आफ्नो चुनावी प्रचार-प्रसार अभियानलाई थप व्यवस्थित र योजनाबद्ध रूपमा अघि बढाउने निर्णय गरेको छ। उम्मेदवार डिल्ली बहादुर घर्ती मगरले सल्यानको मुहार फेर्न र जनमुखी शासन व्यवस्था स्थापनाका लागि आफ्नो चुनाव चिह्न “मौरी” मा मतदान गरी अत्यधिक बहुमतले विजयी गराउन सम्पूर्ण आमाबुवा, दाजुभाइ तथा दिदीबहिनीहरूमा हार्दिक अपिल गर्नुभएको छ।