१९ माघ, काठमाडौं । निर्वाचन आयोगले समानुपातिक निर्वाचन प्रणालीतर्फका ७६ जना उम्मेदवारको नाम बन्दसूचीबाट हटाएको छ।

आयोगका अनुसार कानुनी तथा प्राविधिक मापदण्ड पूरा नभएका उम्मेदवारहरूको नाम बन्दसूचीबाट हटाइएको हो। हटाइएकामध्ये उमेर नपुगेका, मतदाता नामावलीमा नाम नभएका, जरिवाना नतिरेका तथा कालोसूचीमा रहेका उम्मेदवारहरू रहेका छन्।

आयोगले सार्वजनिक गरेको विवरणअनुसार कर्जा सूचना केन्द्रको कालो सूचीमा रहेका २१ जनाको नाम हटाइएको छ। त्यस्तै, प्रदेशसभा समानुपातिकतर्फको बन्दसूचीमा नाम कायम भइसकेका २५ जनाको नाम पनि हटाइएको आयोगले जनाएको छ।

यसैगरी आयोगको जरिवाना भुक्तान नगरेका १० जना, २५ वर्ष उमेर नपुगेका ४ जना, मतदाता नामावलीमा समावेश नभएका १ जना तथा पिछडिएको क्षेत्रको मतदाता नामावलीमा नपरेका २ जनाको नाम हटाइएको छ।

महिला उम्मेदवारको कोटामा पुरुष उम्मेदवारको रूपमा नाम पेश गरिएको १ जना तथा सम्बन्धित राजनीतिक दलको अनुरोधमा १० जनाको नाम बन्दसूचीबाट हटाइएको आयोगले जनाएको छ। अन्य विविध कारणबाट २ जनाको नाम हटाइएको उल्लेख छ।

निर्वाचन आयोगले समानुपातिक उम्मेदवार छनोट प्रक्रियामा कानुनी मापदण्ड कडाइका साथ पालना गरिने स्पष्ट पारेको छ।