काठमाडौं उपत्यकामा जनभावी पार्किङ गरेर रखिएको अवस्थामा ट्राफिक प्रहरीले १५ वटा रात्रि बस नियन्त्रणमा लिएको छ । बुधवार विशेष चेकिङ गरेर ती बसहरूलाई नियन्त्रणमा लिइएको उपत्यका ट्राफिक प्रहरी कार्यालयका एसपी नरेश सुवेदीले बताए ।

लामो दुरीका बसहरूले जथाभाबी पार्किङ गर्ने र बाटो इजाजत अनुसारको गन्तव्यमा नजानेहरूलाई ट्राफिक प्रहरीले कारवाही गरिरहेको छ । नियन्त्रणमा लिइएका बसहरूलाई रामशाहपथस्थित उपत्यका ट्राफिक प्रहरीको कार्यालयमा राखिएको छ ।

ती बसका चालकलाई यातायात व्यवस्था ऐन–२०४९ को दफा ७५ अनुसार १ हजार देखि ५ हजारसम्म जरिवाना गरिने एसपी सुवेदीले बताए । उपत्यका बाहिर चल्ने लामो दुरीका बसलाई रुट परमिट अनुसार मात्रै सञ्चालन गर्ने गरी चालकलाई सचेत गराउने सुवेदीले जानकारी दिए ।