काठमाडौँ – प्रहरी हिरासतमा रहेका दुर्गा प्रसाईं ले सार्वजनिक सन्देश जारी गर्दै चुनाव बहिष्कार गरी देश, धर्म र राष्ट्रिय एकताको पक्षमा उभिन आह्वान गरेका छन्।

प्रसाईंले फागुन ६ गते सार्वजनिक भएको राजाको वक्तव्यलाई उद्धृत गर्दै त्यसले देशलाई गम्भीर सन्देश दिएको उल्लेख गरेका छन्। उनका अनुसार, उक्त वक्तव्यको मूल भाव ‘पहिला देश, धर्म र राष्ट्रिय एकता, त्यसपछि मात्र चुनाव’ हो।

उनले वर्तमान अवस्थामा देश राजनीतिक अस्थिरता, सामाजिक विभाजन, आर्थिक संकट र बाह्य हस्तक्षेपको आशंकाबीच गुज्रिरहेको उल्लेख गर्दै केवल चुनावलाई समाधानको उपाय ठान्नु अपर्याप्त हुने बताएका छन्। जबसम्म राष्ट्रको आधार—एकता, आस्था र स्थायित्व बलियो हुँदैन, तबसम्म चुनावले दीर्घकालीन निकास नदिने उनको भनाइ छ।

प्रसाईंले सम्पूर्ण राष्ट्रवादी शक्ति, दल र सचेत नागरिकहरूलाई आत्मसमिक्षा गर्दै कुर्सीको प्रतिस्पर्धा होइन, राष्ट्र जोगाउने अभियानमा जुट्न आग्रह गरेका छन्।

उनले भनेका छन्, “यो समय व्यक्तिगत वा दलगत स्वार्थभन्दा माथि उठेर देश, धर्म, समाज र राष्ट्रिय अस्तित्वको पक्षमा उभिने हो। आउनुहोस्, चुनाव बहिष्कार गरी देश बचाउने महाअभियानमा एकजुट होऔं।”

उनको सन्देशमा राष्ट्र सुरक्षित भएपछि मात्र साँचो लोकतान्त्रिक अभ्यास सम्भव हुने उल्लेख गर्दै अहिलेको प्राथमिकता चुनाव नभई राष्ट्रिय एकता र देशको रक्षा हुनुपर्नेमा जोड दिइएको छ।