निर्वाचन आयोगले फागुन २१ को प्रतिनिधिसभा सदस्य निर्वाचनको प्रत्यक्षतर्फ ६० जिल्लाको मतपत्र छपाइ सकिएको जनाएको छ । छापिएका मतपत्रमध्ये सुदूरपश्चिम र हिमाली क्षेत्र गरी २५ जिल्लामा पठाउन प्याकिङ गरी तयारी अवस्थामा राखिएको पनि आयोगले जनाएको छ । 

बिहीबार प्रतिनिधिसभा सदस्य निर्वाचन, २०८२ अन्तर्गत मतपत्र छपाइको विवरणबारे आयोगले बिहीबार सार्वजनिक गरेको हो ।  डोल्पा, मुगु, जुम्ला, कालिकोट, हुम्ला, जाजरकोट, दैलेख, रुकुम (पश्चिम भाग), सल्यान, सुर्खेत, बाजुरा, अछाम, बझाङ, डोटी, डडेलधुरा, दार्चुला, बैतडी, कैलाली, कञ्चनपुर, पाँचथर, इलाम, तेह्रथुम, भोजपुर, ओखलढुङ्गा, सुनसरी गरी जम्मा २५ जिल्लाको छपाइ तथा प्याकिङ्ग सम्पन्न भई सकेको आयोगको भनाइ छ । 

प्रत्यक्ष निर्वाचन प्रणाली अन्तर्गत २ करोड ३ लाख २३ हजार मतपत्र छपाइ गर्नु पर्नेछ । मतपत्र छपाइको काम भक्तपुरको सानोठिमीस्थित जनक शिक्षा सामग्री केन्द्रमा भइरहेको छ ।

यसैबिच प्रधानमन्त्री सुशीला कार्कीले प्रतिनिधि सभा सदस्य निर्वाचन, २०८२ का लागि मतपत्र छपाइको प्रगतिबारे जानकारी लिएकी छन् ।  प्रधानमन्त्री कार्की बिहीबार जनक शिक्षा सामग्री केन्द्र लिमिटेडको छापाखानामा अवलोकन निरीक्षणमा गएर मतपत्र छपाइबारे जानकारी लिएकी हुन् । 

मतपत्र छपाइको अनुगमनमा गृहमन्त्री ओमप्रकाश अर्याल, कानुन, न्याय तथा संसदीय मामिला मन्त्री अनिलकुमार सिन्हा, प्रमुख निर्वाचन आयुक्त रामप्रसाद भण्डारीसहित निर्वाचन आयोगका पदाधिकारी पनि सहभागी थिए ।