काठमाडौँ । आगामी २१ फागुनमा हुने प्रतिनिधिसभा निर्वाचनलाई लक्षित गर्दै नेपाली सेनाले गस्ती तथा पेट्रोलिङ सुरु गरेको छ। निर्वाचनको शान्ति–सुरक्षा सुनिश्चित गर्न सेनाले महत्वपूर्ण प्रतिष्ठान, विमानस्थल तथा कारागारहरूको सुरक्षा जिम्मा लिन थालेको हो।

निर्वाचन सुरक्षाका लागि तीन तहको घेरा व्यवस्था गरिएको छ। पहिलो घेरामा नेपाल प्रहरी तथा निर्वाचन प्रहरी, दोस्रो घेरामा सशस्त्र प्रहरी बल तथा निर्वाचन प्रहरी र तेस्रो तथा सबैभन्दा बाहिरी घेरामा नेपाली सेना परिचालन हुने व्यवस्था गरिएको छ।

तर सुरक्षाको आवश्यकता र संवेदनशीलताको आधारमा नेपाली सेना जुनसुकै घेरामा पनि खटिन सक्ने बताइएको छ। प्रमुख जिल्ला अधिकारी, निर्वाचन अधिकृत तथा मतदान अधिकृतसँगको समन्वयमा आवश्यकता अनुसार सेनाको परिचालन गरिने जनाइएको छ।

नेपाली सेनाले आफ्नो फेसबुक पेजमार्फत सार्वजनिक गरेको भिडियो सन्देशमा सुरक्षा संवेदनशीलता उच्च भएका स्थानमा आवश्यक परे सुरुबाटै पहिलो घेरामा समेत सेना परिचालन हुन सक्ने उल्लेख गरेको छ।

युद्धकार्य निर्देशनालयका निर्देशक तथा सहायक रथी मनोज थापाका अनुसार निर्वाचन अवधिभर शान्ति–सुरक्षा कायम गर्न नेपाली सेनाका फौजहरू प्रभावकारी रूपमा परिचालन हुनेछन्।
उनले भने, “हामीसँग उपलब्ध साधन, सामग्री र क्षमताको सदुपयोग गर्दै नेपाली जनताको चाहनाअनुसार निर्वाचनलाई सफलतापूर्वक सम्पन्न गर्न नेपाली सेना पूर्ण रूपमा प्रतिबद्ध छ।”

नेपाली सेनाले निर्वाचनलाई निष्पक्ष, सुरक्षित र शान्तिपूर्ण रूपमा सम्पन्न गराउने लक्ष्यका साथ तयारी तीव्र पारेको जनाएको छ।