आगामी  फाल्गुण २१ गते निर्धारित प्रतिनिधि सभाको निर्वाचन तयारी अनुगमन कार्यक्रमका क्रममा अर्थमन्त्री रामेश्वरप्रसाद खनालले कास्की, पर्वत र म्याग्दी जिल्लाको स्थलगत अनुगमन भ्रमण गरेका छन् । सो क्रममा उनले जिल्लाको निर्वाचन तयारीका सम्बन्धमा प्रमुख जिल्ला अधिकारीसहित जिल्ला स्थित चारवटै सुरक्षा प्रमुखबाट निर्वाचन तयारी, सुरक्षा प्रवन्ध, आचारसंहिता पालनाको अवस्था लगायतका विषयमा जानकारी लिएका छन् । 

बुधबार भएकाे अनुगमनका क्रममा कास्की जिल्लाका प्रमुख जिल्ला अधिकारी रूद्रादेवी शर्माले निर्वाचन आचारसंहिता परिपालनाको स्तर सन्तोषजनक रहेको र कास्की जिल्लाका ५६ वटा मतदान केन्द्रलाई अति संवेदनशील मतदान केन्द्रका रूपमा राखिएको जानकारी गराइन् । 

अर्थमन्त्री खनालले अनुगमनकै क्रममा जिल्ला निर्वाचन कार्यालयमा समेत स्थलगत भ्रमण गरी निर्वाचन तयारीको जानकारी लिएका छन् । सो क्रममा मुख्य निर्वाचन अधिकृत एवम् १ नं निर्वाचन क्षेत्रका निर्वाचन अधिकृत हिमलाल वेल्वासे, २ नं निर्वाचन क्षेत्रका निर्वाचन अधिकृत निर्मला खड्का र १ नं निर्वाचन क्षेत्रका निर्वाचन अधिकृत सीता रेग्मी र प्रदेश निर्वाचन अधिकारी नारायण ढकालले हालसम्मको निर्वाचन तयारी र अवस्थाका बारेमा अर्थमन्त्रीलाई विस्तृत रूपमा जानकारी गराएका थिए । 

निर्वाचन तयारी र आचारसंहिता पालनाको स्थलगत अनुगमन पश्चात् अर्थमन्त्रीले निर्वाचनको तयारी सन्तोषजनक रूपमा अगाडि बढेको र स्थानीय स्तरमा राजनैतिक दलहरूले आन्तरिक विवाद मिलाउन सिर्जना गरेको ह्वास्एप ग्रुपको प्रशंसा गरे । 

यसैगरी पर्वत जिल्लाका प्रमुख जिल्ला अधिकारी लक्ष्मीप्रसाद पौडेलले निर्वाचन आचारसंहिता परिपालनाको स्तर सन्तोषजनक रहेको र जिल्लाका ३५ वटा मतदान केन्द्रलाई अति संवेदनशील मतदान केन्द्रका रूपमा राखिएको जानकारी गराए । 

म्याग्दी जिल्लाको स्थलगत अनुगमन गर्ने क्रममा उक्त जिल्लाका प्रमुख जिल्ला अधिकारी रबिन्द्र आचार्यले निर्वाचन आचारसंहिता परिपालनाको स्तर सन्तोषजनक रहेको र जिल्लाका १५ वटा मतदान केन्द्रलाई अति संवेदनशील मतदान केन्द्रका रूपमा राखिएको जानकारी गराएका थिए । 

तीनवटै जिल्लाको निर्वाचन तयारी र आचारसंहिता पालनाको स्थलगत अनुगमन पश्चात् अर्थमन्त्रीले निर्वाचनको तयारीका कामहरू सन्तोषजनक रूपमा अगाडि बढेको, स्थानीय स्तरमा राजनीतिक दल बिच स्वच्छ र सिर्जनात्मक प्रतिस्पर्धाको वातावरण निर्माण भइरहेको आफूले अनुभूत गरेको जानकारी गराए । निर्वाचनमा स्वतन्त्र, निष्पक्ष र भयरहित वातावरण निर्माणका लागि सरकार प्रतिबद्ध रहेको र अन्य सरोकारवाला सबै पक्षको सहयोग आवश्यक रहेको समेत उनले बताए ।